Ministria e Arsimit dhe Sportit ka publikuar datat zyrtare të provimeve të Maturës Shtetërore 2026 për nxënësit e arsimit të përgjithshëm dhe atij profesional.
Ministrja e Arsimit, Mirela Kumbaro, bëri të ditur se, paralelisht me shpalljen e kalendarit, janë publikuar dhe shpërndarë edhe testet model, me qëllim orientimin e maturantëve gjatë procesit të përgatitjes. Ajo theksoi se çdo shkelje e rregullave gjatë zhvillimit të provimeve do të penalizohet sipas rregullores në fuqi.
Sipas kalendarit zyrtar, provimet e Maturës Shtetërore 2026 do të zhvillohen në këto data:
Gjuhë e huaj më 2 qershor, Gjuhë shqipe dhe letërsi më 9 qershor, Matematikë më 16 qershor dhe Provimi me zgjedhje më 23 qershor 2026.
Të gjitha provimet do të nisin në orën 10:00 dhe do të zgjasin 2 orë e 30 minuta.
Provimi me zgjedhje ofron një gamë të gjerë lëndësh, ku përfshihen Kimi, Biologji, Histori, Gjeografi, Qytetari, Psikologji, Filozofi, Sociologji, Ekonomi, Histori Arti, Histori Muzike dhe Histori Baleti.
Testet e Maturës Shtetërore 2026 do të hartohen, administrohen dhe vlerësohen nga Qendra e Shërbimeve Arsimore. Ndërkohë, testet model janë shpërndarë në të gjitha shkollat për t’u shërbyer nxënësve si udhëzues mbi formatin dhe kërkesat e provimeve, në funksion të një përgatitjeje sa më të plotë. /skyweb.al
