Muaji janar shpesh konsiderohet si periudha më depresive e vitit. Sipas statistikave, gjatë këtij muaji shënohet numri më i lartë i vetëvrasjeve dhe divorceve, ndërsa shumë njerëz përballen edhe me vështirësi financiare.
Por cilët janë faktorët që e bëjnë janarin kaq të rëndë emocionalisht dhe si mund të përballohet kjo gjendje?
Një nga arsyet kryesore lidhet me intensitetin e festave të fundvitit. Gjatë muajit dhjetor, entuziazmi për festime, dhurata, evente dhe mbylljen e vitit – si në jetën profesionale ashtu edhe në atë personale – kërkon shumë energji. Kjo lodhje e akumuluar ndihet më fort në janar, kur ritmi bie dhe mungesa e energjisë bëhet më e dukshme.
Po ashtu, janari karakterizohet nga ditë më të shkurtra dhe net më të gjata. Mungesa e dritës ndikon në çlirimin e melatoninës, hormon që rrit ndjesinë e lodhjes dhe përgjumjes, duke ndikuar negativisht në gjendjen emocionale. Një faktor tjetër i rëndësishëm është gjendja ekonomike, pasi shpenzimet e larta të dhjetorit shpesh reflektohen në janar, duke sjellë stres financiar. Të gjitha këto e bëjnë muajin të duket më i gjatë dhe më i vështirë, veçanërisht kur njerëzit ndihen pa energji, pa stabilitet financiar dhe në kërkim të një drejtimi të qartë për vitin e ri.
Megjithatë, kjo përvojë nuk është e njëjtë për të gjithë. Për ata që e ndiejnë më fort peshën e janarit, është e rëndësishme të ndërmarrin hapa për të mos u zhytur në depresion.
Ekspertët këshillojnë që aktiviteti fizik të jetë pjesë e përditshmërisë, pasi ndihmon në përmirësimin e humorit. Shëtitjet në natyrë, ekspozimi ndaj dritës dhe shmangia e izolimit janë po ashtu shumë të rëndësishme. Kalimi i kohës me miqtë dhe familjarët, si dhe përfshirja në aktivitete argëtuese, mund të ndihmojnë ndjeshëm në lehtësimin e ndjenjave depresive dhe në përballimin më të mirë të këtij muaji. /skyweb.al
