Mazhoranca socialiste ka në plan një reformë të re kushtetuese përpara përfundimit të këtij mandati parlamentar. Kryeministri Edi Rama ka rihapur publikisht debatin për ndryshime në Kushtetutë, duke propozuar uljen e numrit të deputetëve në Kuvendin e Shqipërisë nga 140 në 100.
Pas mbledhjes së grupit parlamentar të Partisë Socialiste, Rama deklaroi se është e nevojshme ngritja e një grupi nismëtar që do të merret me hartimin dhe diskutimin e ndryshimeve kushtetuese. Sipas tij, një Kuvend me më pak deputetë do të ishte më funksional dhe më efikas në vendimmarrje.
Kryeministri theksoi se procesi nuk është i thjeshtë dhe nuk mund të reduktohet në një reformë zgjedhore, por kërkon kohë, ekspertizë dhe angazhim serioz institucional.
“Kemi shtruar nevojën që Kuvendi i Shqipërisë të zvogëlohet në numër. Kemi Kuvend me 140 vetë, fare mirë mund të kemi Kuvend me 100 vetë. Ka edhe aspekte të tjera që duhen trajtuar nga njerëz që dinë çfarë shohin, lexojnë dhe thonë. Kur vjen fjala te Kushtetuta e Shqipërisë duhet ngritur një grup që të hapë një proces. Është shumë më tepër se një reformë zgjedhore, kërkon më shumë hapësirë, angazhim dhe burime”, u shpreh Rama.
Ai nënvizoi se ambicia e mazhorancës është që deri në fund të mandatit të miratohet edhe reforma kushtetuese, paralelisht me përmbushjen e objektivave të integrimit europian.
Duke iu referuar thirrjeve të partnerëve ndërkombëtarë për bashkëpunim politik, Rama deklaroi se e mirëkupton kërkesën për dialog me opozitën, por theksoi se “dialog me zor” nuk ka funksionuar ndonjëherë.
Në të njëjtën kohë, kryeministri u ndal edhe te procesi i integrimit në Bashkimin Europian, duke e cilësuar vitin 2027 si afatin për mbylljen e negociatave. Ai rikujtoi se 83 mandatet e fituara në zgjedhjet e 11 majit përbëjnë, sipas tij, një detyrim politik për të përmbushur premtimet elektorale, nga reformat institucionale deri te standardet europiane në fusha si mjedisi dhe siguria ushqimore./skyweb.al
