Dënimi me vdekje po njeh një rritje shqetësuese në nivel global, paralajmëroi sot Komisioneri i Lartë i OKB-së për të Drejtat e Njeriut, Volker Turk, duke veçuar situatën alarmante në Iran, Arabinë Saudite dhe Shtetet e Bashkuara të Amerikës.
Në një deklaratë të publikuar në Gjenevë, Turk theksoi se, megjithëse prirja globale mbetet drejt shfuqizimit universal të dënimit me vdekje, numri i ekzekutimeve është rritur ndjeshëm gjatë vitit 2025. Sipas tij, kjo rritje lidhet kryesisht me intensifikimin e zbatimit të këtij dënimi në disa shtete që ende e mbajnë në fuqi.
“Zyra ime ka vërejtur një përdorim gjithnjë e më alarmant të dënimit me vdekje në vitin 2025, shpesh edhe për vepra që nuk plotësojnë kriterin e ‘krimeve më të rënda’, siç kërkohet nga e drejta ndërkombëtare”, deklaroi ai.
Në Iran, sipas të dhënave të OKB-së, të paktën 1 500 persona janë ekzekutuar gjatë vitit 2025. Shkalla dhe ritmi i këtyre ekzekutimeve, sipas Turk, tregojnë se dënimi me vdekje po përdoret në mënyrë sistematike si instrument frikësimi nga autoritetet shtetërore.
Situata mbetet po aq shqetësuese edhe në Arabinë Saudite, ku të paktën 356 persona, përfshirë së paku dy të mitur, janë ekzekutuar këtë vit, duke tejkaluar rekordin e vendosur në vitin 2024.
Ndërkohë, në Shtetet e Bashkuara të Amerikës janë regjistruar 47 ekzekutime në vitin 2025, shifra më e lartë e 16 viteve të fundit, sipas Komisionerit të Lartë të OKB-së për të Drejtat e Njeriut. /SKYWEB.AL
