Presidenti amerikan Donald Trump ka ritheksuar nga Forumi Ekonomik Botëror në Davos ambicien e tij dhe të Shteteve të Bashkuara për rimarrjen e Groenlandës nga Danimarka, duke argumentuar se ishulli është kyç për sigurinë globale.
Gjatë fjalës së tij para përfaqësuesve ndërkombëtarë, Trump deklaroi se Groenlanda u fitua nga SHBA gjatë Luftës së Dytë Botërore dhe iu rikthye Danimarkës pas përfundimit të saj, ndërsa sipas tij, sot ka ardhur koha që territori të rikthehet nën kontroll amerikan për arsye sigurie.
“Nuk po kërkojmë gjë tjetër, përveçse një copë akulli. Po kërkojmë atë që fituam gjatë Luftës së Dytë Botërore dhe ia lamë Danimarkës. Vetëm Shtetet e Bashkuara mund ta mbrojnë Groenlandën nga armiqtë,” u shpreh Trump, duke iu referuar rreziqeve që, sipas tij, paraqesin Rusia dhe Kina.
Presidenti amerikan theksoi se SHBA mbetet shtylla kryesore e sigurisë së NATO-s, por ngriti pikëpyetje mbi gatishmërinë e Evropës për të mbështetur Uashingtonin në të njëjtën mënyrë.
Ai foli edhe për marrëdhëniet me aleatët evropianë, duke theksuar se kërkon partnerë të fortë dhe të përgjegjshëm në fushën e sigurisë. Trump rikujtoi se pas marrjes së mandatit të dytë kishte kërkuar rritjen e buxhetit të mbrojtjes së NATO-s nga 2 në 5 për qind.
“Ne besojmë në vlerat që ndajmë me Europën, por duam aleatë seriozë dhe të fortë. Këto janë çështje të sigurisë kombëtare,” tha ai.
Duke iu rikthyer Groenlandës, Trump deklaroi se asnjë vend tjetër përveç SHBA nuk është në gjendje ta garantojë sigurinë e këtij territori. Ai kujtoi se gjatë Luftës së Dytë Botërore, pas pushtimit të shpejtë të Danimarkës nga Gjermania naziste, SHBA ndërhyri për të mbrojtur Groenlandën duke vendosur baza ushtarake dhe duke parandaluar, sipas tij, zgjerimin e kërcënimeve në hemisferën perëndimore.
Trump shtoi se pas përfundimit të luftës, Groenlanda iu rikthye Danimarkës, një vendim që sot, sipas tij, duhet rishikuar.
“Ky ishull është pjesë e Amerikës së Veriut dhe është thelbësor për sigurinë tonë. Politika jonë ka qenë gjithmonë ndalimi i kërcënimeve të jashtme nga hemisfera jonë,” përfundoi presidenti amerikan, duke vendosur çështjen e Groenlandës në qendër të debatit mbi sigurinë e NATO-s dhe të Perëndimit. /skyweb.al
