Ataku në zemër, shenjat që jepen 1 javë para
Edhe pse infarkti akut i miokardit është një urgjencë mjekësore që kërkon ndërhyrje të menjëhershme, ku çdo minutë është vendimtare në shumë raste organizmi jep sinjale paralajmëruese ditë apo edhe javë përpara. Këto shenja nuk duhet të injorohen dhe kërkojnë vlerësim të menjëhershëm nga një profesionist shëndetësor.
Çfarë ndodh gjatë një infarkti?
Gjatë infarktit, arteriet që furnizojnë zemrën me gjak, oksigjen dhe lëndë ushqyese bllokohen. Shkaku më i shpeshtë është sëmundja koronare, e cila karakterizohet nga ngushtimi dhe ngurtësimi gradual i arterieve. Ky proces zhvillohet ngadalë, ndaj simptomat paralajmëruese mund të shfaqen shumë përpara bllokimit të plotë të enëve të gjakut.
Shenjat paralajmëruese që nuk duhen injoruar
Simptoma më e zakonshme është angina pectoris – një ndjesi dhimbjeje, presioni ose shtrëngimi në gjoks, shpesh e shoqëruar me vështirësi në frymëmarrje. Nëse kjo ndjesi shfaqet gjatë aktivitetit fizik, si ecja apo ngjitja e shkallëve, dhe lehtësohet me pushim, është thelbësore të konsultoheni me mjekun.
Edhe shenja më të lehta, sidomos kur zgjasin disa ditë rresht, mund të jenë sinjale alarmi, si:
Vështirësi në kryerjen e aktiviteteve të përditshme ose ngjitjen e shkallëve për më shumë se dy javë
-Dobësi e pashpjegueshme
-Frymëmarrje e vështirësuar pa shkak të dukshëm
-Lodhje e tepruar, që nuk përputhet me nivelin e aktivitetit fizik
Kur situata bëhet kritike
Rreziku rritet ndjeshëm kur simptomat shfaqen papritur, edhe në gjendje pushimi. Kjo mund të tregojë se një infarkt është i afërt. Në këtë fazë, reagimi i shpejtë është jetik. Simptomat tipike përfshijnë:
Dhimbje ose ndjesi shtypjeje në gjoks (pas kockës së kraharorit) që zgjat më shumë se 5 minuta
Dhimbje që përhapet në krah (veçanërisht të majtin), shpinë, qafë, nofull, shpatulla ose pjesën e sipërme të barkut
Ndjesi peshe, ngjeshjeje apo “bllokimi” në gjoks
Djegie në gjoks, që shpesh ngatërrohet me urthin
Te gratë, simptomat mund të jenë më pak tipike
Tek gratë, infarkti shpesh shfaqet me simptoma më të fshehta dhe jo gjithmonë klasike. Këto mund të përfshijnë:
Dhimbje në pjesën e sipërme të barkut, e ngjashme me dhimbjet e stomakut
-Të vjella
-Marramendje
-Ndjesi të fikëti
-Lodhje e madhe dhe e pashpjegueshme
Çdo shenjë e dyshimtë duhet marrë seriozisht. Diagnostikimi dhe ndërhyrja e hershme mund të shpëtojnë jetë.
