Shëndeti oral nuk lidhet vetëm me estetikën, por duket se ka një ndikim të drejtpërdrejtë në jetëgjatësinë e njeriut. Studime të reja nga Japonia sugjerojnë se humbja e dhëmbëve, kariesi i patrajtuar dhe dobësia orale shoqërohen me një rrezik më të lartë vdekjeje, veçanërisht te personat e moshuar, raporton “The Sun”.
Dobësia orale përkufizohet nga prania e të paktën tre simptomave si: më pak se 20 dhëmbë funksionalë, vështirësi në përtypje ose gëlltitje, ndjesi e gojës së thatë apo probleme në të folur.
Një studim gjashtëvjeçar që përfshiu rreth 11 mijë persona mbi moshën 65 vjeç tregoi se individët me dobësi orale kishin një jetëgjatësi më të shkurtër të shëndetshme dhe një rrezik vdekjeje 34 për qind më të lartë krahasuar me ata pa këto probleme.
Edhe fazat e hershme të dobësisë orale, kur shfaqen vetëm një ose dy simptoma, lidhen me përkeqësim të gjendjes shëndetësore dhe rritje të rrezikut. Sipas studiuesve japonezë, ky fenomen nuk shpjegohet vetëm me faktorë ekonomikë apo sëmundje të tjera, por dobësia orale vetë përbën një tregues të rëndësishëm rreziku.
Vizitat e rregullta te dentisti rezultojnë të kenë një ndikim të qartë në jetëgjatësi. Personat që kishin kryer një kontroll dentar brenda gjashtë muajve jetonin mesatarisht rreth një vit më shumë në shëndet të mirë, edhe kur shfaqnin shenja të dobësisë orale. Në të kundërt, ata që nuk kryenin vizita dentare kishin një rrezik vdekjeje 25 për qind më të lartë.
Një tjetër studim, i cili analizoi të dhëna nga rreth 200 mijë persona mbi 75 vjeç, zbuloi se dhëmbët e trajtuar lidhen me mbijetesë më të gjatë. Individët me 21 ose më shumë dhëmbë të shëndetshëm ose të mbushur shfaqnin rrezikun më të ulët të vdekjes, ndërsa te personat pa dhëmbë rreziku ishte ndjeshëm më i lartë – 74 për qind për burrat dhe 69 për qind për gratë.
Sipas ekspertëve, ky ndikim lidhet drejtpërdrejt me aksesin në kujdes dentar. Dhëmbët e trajtuar janë tregues i kontrollit të rregullt, i cili ndihmon në parandalimin e inflamacionit kronik dhe problemeve ushqimore që ndikojnë negativisht në shëndetin e përgjithshëm. /skyweb.al
