Pas më shumë se 20 vitesh dominimi të plotë të telefonit inteligjent, kompanitë më të mëdha teknologjike po përgatiten për një ndryshim të madh. Qëllimi është i qartë: të krijojnë një pajisje të re që një ditë mund të zëvendësojë telefonin.
Gjatë një interviste të fundit, Laurene Powell Jobs i pyeti Sam Altman, drejtuesin e OpenAI, dhe dizajnerin Sir Jony Ive se çfarë pajisjeje po zhvillonin. Ata nuk dhanë detaje, por Altman tha se përdorimi i saj nuk do të ishte si telefoni i sotëm, i cili sipas tij bombardojnë përdoruesin me njoftime, zhurmë dhe shpërqendrim të vazhdueshëm.
Sipas Altman, përdorimi i telefonit sot i ngjan ecjes në Times Square në Nju Jork, me drita që ndizen nga të gjitha anët dhe me zhurmë të pandërprerë.
Kjo tregon se industria po kërkon një pajisje më të qetë, më të thjeshtë dhe më pak varëse nga ekrani.
Aktualisht, tregu i telefonëve kontrollohet pothuajse tërësisht nga dy kompani: Apple dhe Google. Apple përmes iPhone, ndërsa Google përmes sistemit Android që përdoret nga shumica e telefonëve të tjerë.
Këto dy kompani kanë ndërtuar një nga bashkëpunimet më fitimprurëse në histori. Google i paguan çdo vit Apple shuma të mëdha parash që motori i saj i kërkimit të jetë i parazgjedhur në iPhone.
Edhe në epokën e inteligjencës artificiale, bashkëpunimi po thellohet. Apple ka njoftuar se do të përdorë inteligjencën artificiale të Google për të përmirësuar asistentin zanor Siri.
Pavarësisht kësaj, disa kompani po përpiqen të krijojnë diçka ndryshe nga telefoni:
OpenAI po punon për një pajisje të re që pritet të prezantohet në gjysmën e dytë të vitit.
Apple po zhvillon një pajisje të vogël që vishet në trup, e ngjashme me një pin.
Meta po investon te syzet inteligjente, të cilat kanë kamera, altoparlantë dhe mund të shfaqin mesazhe para syve të përdoruesit.
Amazon po zgjeron asistentin Alexa drejt pajisjeve të shtëpisë dhe syzeve inteligjente.
Qëllimi i të gjithëve është i njëjtë: që përdoruesi të mos jetë më i detyruar të mbajë telefonin në dorë për çdo veprim.
Shitjet globale të telefonëve pritet të bien ndjeshëm këtë vit. Arsyeja kryesore është rritja e kostos së pjesëve, sidomos e memories që përdoret brenda telefonëve.
Një tjetër problem është se fabrikat që prodhojnë çipe po preferojnë të punojnë për kompanitë e inteligjencës artificiale, sepse ato paguajnë më shumë sesa prodhuesit e telefonëve.
Kjo e bën prodhimin e telefonëve më të shtrenjtë dhe më të vështirë.
Kompanitë që po sfidojnë telefonin nuk e bëjnë këtë vetëm për teknologjinë, por për para dhe të dhëna.
Apple merr deri në 30 për qind komision nga aplikacionet në iPhone.
OpenAI duhet të ndajë të ardhurat nga abonimet e blera përmes telefonëve.
Meta dëshiron të mbledhë më shumë të dhëna për reklamat, pa u varur nga kufizimet e Apple.
Amazon synon të jetë gjithmonë pranë përdoruesit për ta bërë blerjen sa më të lehtë.
A do të zhduket telefoni? Për momentin, jo.
Në mbarë botën përdoren vetëm rreth 15 milionë syze inteligjente, ndërsa Apple shiti rreth 250 milionë iPhone vetëm vitin e kaluar.
Edhe drejtuesit e industrisë pranojnë se telefonët nuk do të zhduken. Thjesht mund të përdoren më pak, ashtu siç kompjuterët nuk u zhdukën kur dolën telefonët.
Ndërsa beteja vazhdon, një kompani po përfiton më shumë se të tjerat: Google.
Duke futur inteligjencën artificiale Gemini si në iPhone ashtu edhe në Android, Google po mbledh më shumë të dhëna se kushdo tjetër.
Vlera e kompanisë mëmë Alphabet ka kaluar atë të Apple dhe sot renditet e dyta në botë, pas Nvidia.
Në këtë garë të re, telefoni inteligjent nuk ka rënë ende, por për herë të parë po sfidohet seriozisht. /Përshtati nga The Economist: Skyweb.al
