Në vitin 2024, emigrantët shqiptarë dërguan në Shqipëri rreth 1.4 miliardë euro, sipas të dhënave të publikuara nga Eurostat. Këto transferta përfshijnë kryesisht paratë që emigrantët u dërgojnë familjeve të tyre, zakonisht pa kundërshpërblim.
Shifra e publikuar nga Eurostat rezulton më e lartë se ajo e Bankës së Shqipërisë, e cila vlerëson se remitancat gjatë vitit 2024 ishin rreth 1 miliard euro, raporton Monitor.
Të dhënat tregojnë gjithashtu shpërndarjen e transfertave sipas shteteve, duke reflektuar ndryshime të dukshme në gjeografinë e emigracionit shqiptar.
Tradicionalisht, Italia dhe Greqia kanë qenë burimet kryesore të remitancave, për shkak të numrit të lartë të emigrantëve që u larguan në fillim të viteve ’90 dhe që vijuan emigrimin për shkak të afërsisë gjeografike. Por statistikat e vitit 2024 tregojnë se kjo hartë ka nisur të ndryshojë, me rënie relative të Greqisë dhe forcim të destinacioneve të reja si Mbretëria e Bashkuar dhe Gjermania.
Italia mbetet ende në krye, me 370 milionë euro të dërguara gjatë vitit 2024, ose 25.7 për qind të totalit të transfertave personale.
Në vend të dytë renditet Mbretëria e Bashkuar, nga e cila emigrantët shqiptarë kanë dërguar 243 milionë euro. Ky shtet ka pritur një numër të lartë shqiptarësh vitet e fundit, duke u kthyer edhe në një shqetësim për autoritetet britanike për shkak të fluksit të emigracionit të paligjshëm. Një pjesë e konsiderueshme e emigrantëve raportohet se punojnë në aktivitete informale, çka ka sjellë të ardhura të shpejta dhe relativisht të larta, të reflektuara edhe në rritjen e transfertave drejt Shqipërisë.
Në vend të tretë renditet Gjermania, me 231 milionë euro të dërguara gjatë vitit 2024. Ky vend është kthyer vitet e fundit në një destinacion të preferuar për profesionistë si mjekë, infermierë dhe specialistë të teknologjisë së informacionit, të cilët përfitojnë paga më të larta dhe kanë mundësi të mbështesin financiarisht familjet e tyre në Shqipëri.
Greqia renditet vetëm e katërta, me 202 milionë euro, pavarësisht numrit të lartë të shqiptarëve që jetojnë dhe punojnë atje. Një nga arsyet lidhet me transferimin e parave cash, për shkak të lidhjes tokësore mes dy vendeve, që shpesh nuk reflektohet plotësisht në statistika.
Në vend të pestë renditen Shtetet e Bashkuara të Amerikës, me 159 milionë euro të dërguara gjatë vitit 2024. SHBA mbetet një nga destinacionet më të dëshiruara për emigracion, kryesisht përmes lotarisë amerikane dhe formave të tjera të migrimit.
Franca, ndonëse kryeson për kërkesat për azil nga shtetasit shqiptarë, nuk rezulton të ketë të ardhura të larta për emigrantët, pasi transfertat në vitin 2024 ishin vetëm 38 milionë euro.
Pas saj renditet Irlanda, ku shqiptarët kanë dërguar rreth 24 milionë euro. Më tej vijnë Kanadaja me afro 20 milionë euro, Zvicra me 19.3 milionë euro, Belgjika me 15.1 milionë euro dhe Austria me 11 milionë euro.
Nga shtetet e tjera, transfertat personale janë më të ulëta se 10 milionë euro. Sipas Eurostat, shqiptarët kanë arritur të dërgojnë para edhe nga qendra financiare offshore, por shumat mbeten minimale, rreth 1.4 milionë euro në vit.
Në total, Eurostat raporton se gjatë vitit 2024 në Shqipëri kanë hyrë rreth 2.1 miliardë euro nga transfertat personale dhe kompensimi i punonjësve. Rreth 68 për qind e kësaj shume përbëhet nga dërgesat e emigrantëve, ndërsa pjesa tjetër, rreth 32 për qind ose 663 milionë euro, lidhet me kompensimin e punonjësve që punojnë përkohësisht jashtë vendit.
