Në mbledhjen e sotme të Këshillit të Ministrave, u vendos rihapja e rrjetit social TikTok, duke e bërë aplikacionin sërish të aksesueshëm në të gjithë territorin e Shqipërisë.
Sipas vendimit, Autoriteti Kombëtar për Sigurinë Kibernetike (AKSK), në bashkëpunim me institucionet rregullatore përkatëse, do të ndërmarrë të gjitha veprimet e nevojshme për heqjen e masave që kishin kufizuar aksesin në këtë platformë.
TikTok ishte i bllokuar në Shqipëri që prej 13 marsit të vitit të kaluar, pas një vendimi për pezullimin e tij për një periudhë njëvjeçare. Ky vendim u mor pas një procesi konsultimi të nisur nga qeveria me prindërit, i cili u nxit nga vrasja tragjike e një 14-vjeçari në shkollën “Fan Noli”.
