Një draft i hedhur për konsultim për ndryshimet në vendimin e Këshillit të Ministrave mbi hyrjen, qëndrimin dhe trajtimin e të huajve në Shqipëri parashikon një sërë risish, me fokus lehtësimin e procedurave dhe rritjen e transparencës. Risi kryesore është unifikimi dhe digjitalizimi i aplikimeve për vizë dhe leje qëndrimi, duke i mundësuar ato online.
Projektakti parashikon përjashtimin nga detyrimi për vizë për shtetasit e vendeve të treta që disponojnë vizë ose leje qëndrimi të vlefshme të lëshuara nga një shtet i BE-së, për qëndrime deri në 90 ditë brenda 180 ditëve, për qëllime turistike.
Ndryshime janë bërë edhe në dokumentacionin bazë, duke shtuar kërkesën për leje qëndrimi mbi 12 muaj nga vendi i rezidencës dhe certifikatën e gjendjes gjyqësore, të vlefshme deri në 6 muaj, me përjashtime për moshat nën 16 dhe mbi 75 vjeç.
Janë përmirësuar dhe saktësuar procedurat për vizat e tipit “D” dhe lejen unike, si dhe është shtuar dokumentacion specifik për kategori të reja si punëtorët shtëpiakë, sportistët dhe punëtorët stinorë. Për studentët është vendosur detyrimi për garanci financiare prej 300 mijë lekësh.
Po ashtu, janë qartësuar kriteret për ripërtëritjen e lejeve të qëndrimit, si dhe dokumentacioni për investitorët e huaj, me synim një proces më të qartë, të standardizuar dhe në përputhje me praktikat evropiane. /skyweb.al
