Sipas Institutit të Gjeoshkencave, pasditen e së mërkurës dhe të enjtes priten reshje mesatare deri lokalisht intensive në qarqet Shkodër, Vlorë dhe Gjirokastër, ndërsa në Kukës, Fier, Berat dhe Korçë reshjet do të jenë të dobëta deri mesatare, të shoqëruara me shtrëngata. Në 24 orët në vijim, reshje të dobëta parashikohen edhe në qarqet e tjera të vendit.
Temperaturat do të ulen ditën e enjte me rreth 3 gradë Celsius, ku minimalet pritet të zbresin në 1 gradë dhe maksimalet të mos i kalojnë 15 gradë. Në zonat mbi 1 mijë metra mbi nivelin e detit, reshjet do të jenë në formë dëbore, duke përfshirë Veriun, Lindjen dhe Juglindjen.
Era pritet të jetë problematike, veçanërisht në Jug dhe në zonat bregdetare, ku do të fryjë mesatare deri e fortë. Për pasojë, lundrimi i mjeteve të vogla dhe atyre të peshkimit mbetet i pezulluar dhe kjo situatë pritet të vijojë deri të enjten, kur era do të nisë të dobësohet. /skyweb.al
