Problemet për “Diellën”, projektin digjital të krijuar nga AKSHI duke u bërë fytyra e këtij institucioni, nuk ndalen vetëm te skandali i korrupsionit që ka përfshirë drejtues dhe kompani të lidhura me AKSHI-n. Pas hetimeve të SPAK që kanë ekspozuar abuzime me fondet publike, projekti është tashmë në qendër të një përplasjeje të re ligjore, këtë herë për përdorimin e imazhit.
Sipas Zëri, aktorja e njohur Anila Bisha ka depozituar padi në Gjykatën Administrative ndaj Këshilli i Ministrave, kompanisë Apeldhe AKSHI-t, duke kërkuar pezullimin e përdorimit të imazhit të saj në funksionin e ashtuquajturës “ministre Diella”.
Sipas padisë, imazhi i Diellës është një rikrijim në formë avatari i pamjes së Anila Bishës, ndërkohë që kontrata e nënshkruar mes aktores dhe kompanisë Aleat kishte një objekt të kufizuar dhe afat të përcaktuar qartë. Kontrata, e vlefshme deri më 31 dhjetor 2025, parashikonte përdorimin e imazhit dhe zërit të aktores vetëm për asistencën virtuale Diella në platformën e-Albania, dhe jo për shtrirjen e figurës së saj si “ministre” apo funksion publik me rol politik dhe simbolik.
Në kërkesën drejtuar gjykatës, aktorja kërkon marrjen e masës së sigurimit për ndalimin e menjëhershëm të përdorimit të imazhit të saj deri në përfundim të procesit gjyqësor, duke argumentuar se përdorimi aktual tejkalon marrëveshjen kontraktuale dhe cenon të drejtat e saj.
Rasti rikthen në vëmendje mënyrën se si u konceptua dhe u promovua Diella, një projekt i AKSHI-t që u prezantua publikisht si simbol i digjitalizimit të administratës.
Vetë Anila Bisha ka deklaruar më herët se ajo ishte kontaktuar për një projekt artistik dhe teknologjik, pa pasur dijeni se figura e krijuar mbi bazën e imazhit të saj do të shndërrohej në një rol të tillë publik.
Ajo ka pranuar se është paguar për përdorimin e imazhit dhe zërit, por ka theksuar se marrëveshja kishte të bënte ekskluzivisht me Diellën e e-Albania-s.
Padia vjen në një moment kur AKSHI ndodhet nën presion të fortë publik dhe institucional, për shkak të dosjes së korrupsionit që ka zbuluar një skemë abuzimi me tendera dhe fonde publike.
Në këtë kontekst, rasti i Diellës shton një tjetër problematikë, këtë herë në planin ligjor dhe etik, duke ngritur pikëpyetje mbi mënyrën se si janë menaxhuar kontratat, të drejtat e imazhit dhe transparenca në projektet digjitale të shtetit.
Ndërsa hetimet për “çunat” e AKSHI-t vijojnë, çështja e Anila Bishës pritet të hapë një front të ri përballjeje në gjykatë, duke e kthyer Diellën nga një simbol i digjitalizimit në një burim të vazhdueshëm konfliktesh ligjore dhe institucionale. /skyweb.al
