Anëtarësimi i Shqipërisë në SEPA po përkthehet në një ndryshim të prekshëm për bizneset që kryejnë pagesa në euro, duke ulur ndjeshëm kostot e transfertave ndërkufitare dhe duke i afruar ato me standardet e Bashkimit Evropian.
Para këtij integrimi, sipas një studimi të Banka Botërore mbi pagesat biznes-me-biznes në Ballkanin Perëndimor, transfertat nga Shqipëria drejt vendeve të BE-së rezultonin dukshëm më të shtrenjta se brenda vetë unionit.
Një transfertë prej 5 mijë eurosh kushtonte mesatarisht rreth 0.50% të shumës, ndërsa për 20 mijë euro rreth 0.34%. Në disa korridore specifike, tarifa për 5 mijë euro arrinte deri në 0.76%.
Në të njëjtën kohë, brenda BE-së kostot lëviznin në nivele minimale, nga 0.02% deri në 0.05%, çka nënkuptonte se bizneset shqiptare paguanin deri në 10 deri në 17 herë më shumë për të njëjtin transaksion.
Pas anëtarësimit dhe operacionalizimit të skemës, sipas të dhënave të Banka e Shqipërisë, tarifat kanë rënë në mënyrë drastike. Për një transfertë prej 5 mijë eurosh, kostoja ka zbritur nga 0.76% në 0.08%, rreth 90% më pak.
Për transfertat prej 20 mijë eurosh, tarifa ka rënë nga 0.47% në vetëm 0.02%, një ulje mbi 95%.
Në praktikë, kjo do të thotë se pagesat që më parë kushtonin qindra euro, sot realizohen me një kosto minimale.
Efekti ekonomik pritet të jetë i konsiderueshëm. Vlerësimet tregojnë se gjatë vitit të parë të zbatimit, ekonomia shqiptare mund të kursejë rreth 70 milionë euro falë reduktimit të kostove të transaksioneve në euro.
Nga një realitet ku transfertat ndërkufitare ishin shumë herë më të kushtueshme se në BE, Shqipëria po hyn në një fazë të re ku pagesat në euro trajtohen me standarde të njëjta me ato evropiane, një zhvillim që forcon integrimin ekonomik dhe rrit konkurrueshmërinë e bizneseve shqiptare në tregun ndërkombëtar. /skyweb.al
