Blegtorët në vend po i rikthehen protestave pas ndryshimeve në skemën kombëtare të bujqësisë për vitin 2026, të cilat sipas tyre nuk reflektojnë nevojat reale të sektorit. Shoqata e Blegtorëve Prodhues të Qumështit ka lajmëruar një protestë ditën e martë para Ministrisë së Bujqësisë dhe Zhvillimit Rural.
Reagimi vjen vetëm pak ditë pas miratimit të skemës së re, e cila parashikon heqjen e naftës falas për fermerët dhe rritjen e subvencioneve direkte. Konkretisht, pagesa për lopë është rritur nga 10 mijë lekë për fermat me më pak se 10 krerë, në 12 mijë lekë për fermat me më pak se 5 krerë.
Megjithatë, sipas ekspertit të bujqësisë Ervin Resuli, ndryshimet nuk përkthehen në përfitim real për blegtorët. Ai thekson se heqja e naftës falas ka një ndikim më të madh negativ sesa rritja e subvencioneve, duke e bërë skemën më pak mbështetëse për sektorin.
Sipas tij, nëse qeveria synonte një rishikim të skemës, ajo duhej të fokusohej në uljen e kostove të prodhimit, duke marrë parasysh edhe rritjen e çmimeve si pasojë e krizës së luftës, që ka shtrenjtuar ndjeshëm naftën dhe plehrat kimike, këto të fundit deri në 50%.
Resuli nënvizon në Monitor se sektori i bujqësisë dhe blegtorisë vazhdon të përballet me mungesë politikash zhvillimore dhe me një skemë që nuk adreson rritjen e kostove. Sipas tij, rritja e pagesave direkte nuk e kompenson heqjen e naftës falas dhe nuk ndikon realisht në uljen e shpenzimeve për fermerët.
Ai sjell edhe një shembull konkret: një fermë me 100 krerë lopë mund të përfitojë rreth 150 mijë lekë më shumë nga subvencionet, por humbet rreth 500 mijë lekë nga heqja e naftës falas. Në total, sipas kësaj llogarie, humbja neto arrin në rreth 350 mijë lekë.
Pakënaqësitë lidhen edhe me mosrespektimin e dakordësive të mëparshme. Para miratimit të skemës, shoqata kishte kërkuar një mbështetje prej 20 mijë lekësh për lopë pa tavan, ndërsa gjatë negociatave ishte arritur dakordësia për 15 mijë lekë për krerë. Kjo marrëveshje, sipas blegtorëve, nuk u reflektua në vendimin final.
Anëtarët e shoqatës shprehen se ndihen të zhgënjyer jo vetëm nga mosmbajtja e premtimeve, por edhe nga vendimet që, sipas tyre, rrisin barrën financiare në një periudhë të vështirë për sektorin.
Ndërkohë, ekspertët kritikojnë edhe skemën e kompensimit të TVSH-së në masën 10%, duke theksuar se ajo nuk ndihmon në uljen e kostove të prodhimit, por kufizon fermerët, pasi përfitimi lidhet me shitjen përmes pikave të grumbullimit dhe përjashton një pjesë të prodhuesve.
