Bëhet fjalë për kriptovaluta të llojit Tether (USDT), me një vlerë ekuivalente prej rreth 12.4 milionë eurosh, të cilat janë sekuestruar në muajin shtator të vitit të kaluar në kuadër të hetimeve të SPAK.
Në total, gjatë vitit 2025 vlera e aseteve të sekuestruara dhe konfiskuara nga SPAK arriti në rreth 45.4 milionë euro. Nga kjo shumë, rreth 43.49 milionë euro përfaqësojnë pasuri të sekuestruara, ndërsa rreth 1.91 milionë euro janë pasuri të konfiskuara përfundimisht.
Shifrat tregojnë se pjesa dërrmuese e vlerës së aseteve të bllokuara i përket sekuestrimeve, të cilat përbëjnë rreth 96 për qind të totalit të pasurive të evidentuara gjatë vitit 2025.
Sipas raportit, nga rreth 43.5 milionë euro pasuri të sekuestruara, pjesa më e madhe, rreth 28.8 milionë euro, lidhet me masa të vendosura në kuadër të Kodit të Procedurës Penale. Ndërkohë, rreth 14.7 milionë euro janë sekuestruar në bazë të Ligjit Antimafia.
Raporti evidenton gjithashtu se gjatë vitit 2025 janë sekuestruar rreth 1.1 milionë euro pasuri në kuadër të procedimeve për korrupsion, ndërsa vlera e pasurive të konfiskuara përfundimisht në këto raste arrin në rreth 100 mijë euro.
Të dhënat tregojnë edhe një ulje të vlerës totale të aseteve të sekuestruara dhe konfiskuara krahasuar me vitin 2024. Nëse një vit më parë kjo shifër arrinte rreth 65 milionë euro, gjatë vitit 2025 ajo ka zbritur në rreth 45.4 milionë euro. /skyweb.al
