Aktiviteti i regjistrimit të bizneseve në Qendrën Kombëtare të Biznesit është rritur ndjeshëm gjatë shkurtit 2026 krahasuar me të njëjtin muaj të vitit 2025. Në total u regjistruan 13,324 aplikime, rreth 17% më shumë se një vit më parë, ku pjesa më e madhe lidhet me aplikimet në Regjistrin Tregtar.
Edhe numri i bizneseve të reja u rrit, duke arritur në 2,046 subjekte, nga 1,716 që ishin në shkurt 2025. Tirana kryeson me mbi gjysmën e regjistrimeve, e ndjekur nga Durrësi, Vlora dhe Fieri. Forma më e zakonshme e organizimit mbetet sipërmarrja individuale, ndërsa shoqëritë me përgjegjësi të kufizuar përbëjnë pjesën tjetër kryesore.
Bizneset e reja përqendrohen kryesisht në tregti, akomodim dhe shërbime ushqimore, si dhe në informacion dhe komunikacion. Ndërkohë, numri i lejeve dhe licencave të reja shënoi një rënie të lehtë krahasuar me vitin e kaluar.
Të dhënat tregojnë gjithashtu rritje të sipërmarrjes femërore, me 650 biznese të administruara nga gra gjatë muajit shkurt. Në tërësi, treguesit konfirmojnë rritjen e interesit për hapjen e bizneseve dhe vazhdimin e dominimit të sektorit të shërbimeve dhe tregtisë në ekonominë shqiptare. /skyweb.al
