Një situatë e pazakontë institucionale është regjistruar mes Bashkisë Himarë dhe Agjencisë Shtetërore të Kadastrës. Drejtuesit e dy institucioneve kanë nënshkruar një marrëveshje bashkëpunimi ku marrin përsipër të kryejnë një shërbim që në fakt është detyrim i tyre ligjor ndaj qytetarëve.
Në praktikën e përgjithshme, marrëveshje bashkëpunimi zakonisht nënshkruhen mes institucioneve publike dhe subjekteve private, ose mes dy subjekteve private për të koordinuar një aktivitet të caktuar.
Por në këtë rast bëhet fjalë për dy institucione shtetërore që kanë detyrim ligjor të ofrojnë shërbime për qytetarët dhe që nuk kanë nevojë për një marrëveshje për të zbatuar ligjin… përveç rasteve kur duan të bëjnë show.
Sipas njoftimit të ASHK, Bashkia Himarë dhe Kadastra kanë firmosur një dokument ku zotohen se do të shërbejnë për regjistrimin e pronave të qytetarëve në hipotekë, një proces që është pjesë e detyrave të përditshme të ASHK, pavarësisht nëse ekziston apo jo një marrëveshje bashkëpunimi me pushtetin lokal.
Marrëveshja synon realizimin e regjistrimit fillestar në disa zona kadastrale të Bashkisë Himarë.
“Himara është e organizuar në 24 zona kadastrale, nga të cilat 15 kanë regjistrim fillestar, ndërsa 3 zona janë në fazën përfundimtare të procesit.
Me marrëveshjen e nënshkruar, puna do të vijojë edhe për 6 zona të tjera kadastrale”, thuhet në njoftimin e institucionit.
Procesi i regjistrimit do të zhvillohet në zonat Çorraj, Fterrë, Gjilekë, Kallarat dhe Pilur, si edhe në zonën kadastrale 1952 në qytetin e Himarës.
Sipas Kadastres, ky bashkëpunim do t’u japë qytetarëve mundësinë të pajisen me dokumentacion të plotë pronësie dhe do të forcojë sigurinë juridike mbi pronën e tyre.
Megjithatë, mënyra se si është paraqitur ky zhvillim ka ngritur pikëpyetje, pasi regjistrimi i pronave është detyrim ligjor i institucioneve shtetërore dhe jo një shërbim që varet nga nënshkrimi i marrëveshjeve mes tyre.
Në këtë kontekst, marrëveshja duket më shumë si një akt formal publik dhe një fushatë PR, sesa një instrument i domosdoshëm për funksionimin e administratës.
Ky postim vjen në një moment kur drejtuesit e dy institucioneve janë përballur me vëmendje të shtuar mediatike dhe verifikime nga institucionet ligjzbatuese për disa veprime të diskutueshme që lidhen me pronat në zonën e Himarës.
Si kryetari i Bashkisë Himarë, Vangjel Tavo, ashtu edhe drejtuesja e Kadastrës, Lorena Goxhobelli, kanë qenë në qendër të raportimeve dhe hetimeve për çështje që lidhen me administrimin dhe regjistrimin e pronave në këtë zonë bregdetare. /skyweb.al
