Shkencëtarët kanë zhvilluar një metodë të re për trajtimin e sëmundjeve të rënda të syrit duke krijuar implante të kornesë nga luspat e peshkut, një zbulim që mund të ofrojë një alternativë më të lirë dhe më të aksesueshme ndaj transplantit tradicional të kornesë, shkruan Reuters.
Studiues nga Universiteti i Granadës në Spanjë kanë krijuar një korné artificiale duke përdorur luspa nga disa lloje peshqish që gjenden zakonisht në treg. Sipas ekipit kërkimor, materiali i përftuar është transparent, rezistent dhe shumë i pajtueshëm me indet biologjike.
Kornea është shtresa e tejdukshme në pjesën e përparme të syrit dhe është shumë e vështirë të riparohet kur dëmtohet rëndë, pasi nuk ka enë gjaku dhe ka aftësi të kufizuara rigjenerimi. Në shumicën e rasteve të sëmundjeve të rënda, pacientët kanë nevojë për transplant nga një donator njerëzor, por këto procedura shpesh kufizohen nga mungesa e indeve dhe listat e gjata të pritjes.
Sipas studiuesve, implantet e krijuara nga luspat e peshkut mund të jenë një alternativë e lirë dhe e lehtë për t’u siguruar. Profesorja e histologjisë Ingrid Garzon, bashkëautore e studimit, tha se materiali është “i aksesueshëm, i lehtë për t’u siguruar dhe me kosto të ulët”, duke shtuar se mund të ketë edhe ndikim pozitiv në industrinë lokale të peshkimit.
Testimet laboratorike dhe eksperimentet në kafshë kanë treguar rezultate premtuese në riparimin dhe rigjenerimin e kornesë. Megjithatë, teknologjia është ende në fazë eksperimentale dhe duhet të kalojë në prova klinike tek njerëzit përpara se të përdoret gjerësisht në mjekësi.
Ekspertët theksojnë se zhvillimi i metodave të reja për rigjenerimin e kornesë është i rëndësishëm për të reduktuar varësinë nga donacionet e organeve dhe për të përmirësuar trajtimin e pacientëve me probleme të rënda të shikimit. /skyweb.al
