Administrata Tatimore ka bërë publike të dhëna të reja mbi të ardhurat nga platformat e akomodimit online, duke treguar për një rritje të fortë të këtij tregu në Shqipëri.
Sipas të dhënave për vitin 2024, mbi 8,400 individë dhe biznese kanë ofruar akomodim përmes Airbnb, duke gjeneruar rreth 3.8 miliardë lekë të ardhura, ose afro 40 milionë euro. Vetëm komisionet e paguara ndaj platformës arrijnë në rreth 167.5 milionë lekë.
Paralelisht, edhe platforma Booking vijon të ketë volum të lartë aktiviteti. Për periudhën janar-shtator 2025, të ardhurat nga rezervimet kanë arritur në rreth 80.1 milionë euro, ndërsa mbi 17 mijë individë dhe subjekte kanë qenë aktivë në këtë treg. Komisionet për platformën llogariten rreth 12.8 milionë euro.
Në këtë kuadër, Administrata Tatimore thekson se disponon të dhëna të detajuara mbi rezervimet dhe fitimet e realizuara përmes këtyre platformave dhe u bën thirrje të gjithë përfituesve të ardhurave që t’i deklarojnë ato në Deklaratën Vjetore të të Ardhurave Personale, DIVA 2025.
Afati përfundimtar për deklarimin është 31 marsi 2026, ndërsa mosdeklarimi konsiderohet shkelje e ligjit dhe shoqërohet me penalitete.
Autoritetet kërkojnë që individët dhe bizneset të verifikojnë përputhjen e deklarimeve të tyre me të dhënat e platformave, për të shmangur kontrollet dhe masat ndëshkuese.
