Shoqata Kombëtare e Transportit Qytetas dhe Shoqata e Transportit Urban dhe Interurban kanë dalë me një deklaratë publike, ku paralajmërojnë reduktim të shërbimit në rast se qeveria nuk ndërhyn për të kompensuar rritjen e çmimit të karburantit.
Sipas tyre, nëse nuk merren masa të menjëhershme, duke nisur nga e hëna mund të ketë ulje të flotës deri në 30%, çka do të sillte vështirësi të mëdha në lëvizjen e qytetarëve.
Shoqatat kërkojnë heqjen e TVSH-së për transportin publik, rishikimin e barrës fiskale mbi karburantin dhe aplikimin e subvencioneve nga shteti, me qëllim ruajtjen e çmimit aktual të biletës.
Në deklaratë theksohet se rritja e çmimit të naftës nga rreth 145 lekë/litër në rreth 214 lekë/litër ka shtuar ndjeshëm kostot e operimit, ndërsa pesha e lartë e taksave mbi karburantin ka rënduar më tej situatën financiare të operatorëve.
Megjithatë, kjo nuk është hera e parë që sektori i transportit reagon në këtë mënyrë. Sa herë ka rritje të çmimit të naftës, përfaqësuesit e tij dalin me paralajmërime për reduktim shërbimi, duke kërkuar ndërhyrje financiare nga shteti.
Nga ana tjetër, kur çmimet e karburantit kanë qenë në nivele më të ulëta, nuk është reflektuar asnjë ulje e çmimit të biletave për qytetarët. Përkundrazi, në disa raste janë regjistruar edhe rritje, si në Kamëz, ku tarifa e transportit u çua në 50 lekë.
Në këto kushte, kërkesat për subvencione dhe paralajmërimet për bllokim të shërbimit rikthejnë debatin mbi mënyrën e funksionimit të këtij sektori dhe raportin e tij me qytetarët dhe financat publike. /skyweb.al
