Një 11-vjeçar hyn në një tabakino në zonën e “Ali Demit” në Tiranë dhe i kërkon shitëses të blejë një “Vape”.
I mituri, pjesë e këtij investigimi, largohet pa mundur ta marrë atë, me këshillën e shitëses se është i vogël dhe nuk mund të konsumojë këtë produkt.
Edhe në një tjetër tabakino, në “Rrugën Bardhyl”, 11-vjeçari del pa sukses, pavarësisht se tentoi ta bindë shitësen duke i thënë se e kërkon “Vape” për motrën e tij në moshë madhore.
Pajisjen me bateri e cila ngroh lëngun me përmbajtje të nikotinës dhe krijon avull që thithet në mushkëri, i mituri arrin ta marrë në një tjetër pikë shitje. Nga kjo kioskë në qendër të Tiranës, fëmija largohet me “Vape” në dorë, të cilën e bleu për 1 mijë lekë të rinj, pa faturë tatimore.
Mes vështirësive për ta siguruar këtë pajisje elektronike shpesh edhe me shije të ndryshme, të miturit kanë zbuluar të tjera metoda për ta pasur atë.
Një vëzhgim i Report Tv nxjerr në pah se të rinjtë, nën moshën 18 vjeç, po përdorin platformave të porosive online.
Bashkëpunëtori ynë, fëmija 11-vjeçar porosit një Vape në një nga tabakinot që gjendet të reklamuara në aplikacionin Delivery, Wolt. Pajisja kushton gjithashtu 1 mijë lekë, por bashkë me transportin arrin në 1230 lekë.
E vetmja pyetje që shfaqet në aplikacionin e Wolt, është nëse porositësi është mbi 18 vjeç. Por mjaftoi një përgjigje po, dhe motoristi mbërriti pa vonesë në adresë.
11-vjecari i afrohet dhe motoristi i jep në dorë “Vape”, duke i marrë edhe pagesën cash, pa i dhënë as faturë tatimore.
Edhe në këtë rast, vetëm një këshillë, pirja e vape në këtë moshë, nuk është e shëndetshme. Motoristi nuk i kërkon asnjë mjet identifikimi të voglit.
Por pse të miturit po konsumojnë në masë Vape?
“Në këtë rast fëmijët janë viktima. Janë viktima të tregut, të një presioni të modës, të imitimeve që i bëjnë njëri-tjetrit dhe të faktit që niveli i pjekurisë së tyre është i pamjaftueshëm për të kuptuar rrezikshmërinë e këtyre veseve sociale, të veseve individuale që ndikojnë jashtëzakonisht Shumë në zhvillimin e tyre fizik dhe në zhvillimin e personalitetit të tyre.”, shpjegon sociologu Gëzim Tushi.
Që Vape është kthyer në një trend gjithnjë e më shqetësues, reflektohet edhe nga vëzhgimi në disa lokale në Tiranë, ku sheh fëmijë në moshë shumë të vogël që e konsumojnë hapur atë.
Pasojat që kjo pajisje lë në shëndet janë serioze.
“Sidomos në moshat e vogla. Varësia, ajo fizike dhe medikamentoze , është po e njëjtë. Pra duke qenë se ka nikotinë, nikotina krijon varësi. Shto dhe përzierjen me këto elementë konservonte të cilat shkaktojnë deri dhe efekte kancerogjene më shumë sesa vetë nikotina. Kjo bëhet tepër e rrezikshme. Kollë, vështirësi në frymëmarrje, fishkëllima dhe rrahje të shpeshta të zemrës që mund të shoqërohen deri dhe me dhimbje të gjoksit.”, thotë pneumologu Serxho Golgota.
Fenomeni nuk kalon pa u vënë re edhe nga qytetarët.
“Që nga klasa e katërt, thjesht mësojnë shoku-shokun” deklaroi një zonjë.
“Ves i keq, më i keqi dhe më i dëmshmi.” tha një zotëri
“Duhet të Ndalohet, kaq!” u shpreh një zotëri.
