Shqipëria renditet ndër vendet me nivelin më të lartë të gatishmërisë për të luftuar për vendin, sipas një analize të publikuar nga think-tanku amerikan Foreign Policy Research Institute.
Sipas të dhënave, 69% e shqiptarëve deklarojnë se do të ishin të gatshëm të merrnin armët për vendin e tyre, duke e vendosur Shqipërinë në vendin e dytë pas Turqisë, ku gatishmëria arrin 88%. Shqipëria qëndron përpara vendeve të tjera si Suedia, Finlanda dhe Mali i Zi.
Sondazhi, i realizuar nga Riga Stradins University në bashkëpunim me Center for Geopolitical Studies Riga, përfshiu mbi 31,000 të anketuar në të gjitha vendet e NATO-s dhe ishte përfaqësues në nivel kombëtar për secilin shtet.
Në dhjetëshen e parë të vendeve më të gatshme për të luftuar për vendin bëjnë pjesë edhe Greqia, Norvegjia, Lituania, Polonia dhe Sllovenia, ndërsa në fund të listës renditen Italia, Sllovakia, Gjermania dhe Holanda.
Analiza thekson se gatishmëria e lartë lidhet shpesh me perceptimin e kërcënimeve të jashtme, si dhe me faktorë historikë e kulturorë. Megjithatë, autorët paralajmërojnë se përgjigjet në sondazhe nuk përkthehen gjithmonë në sjellje reale në rast lufte, pasi vendimet e individëve mund të ndikohen nga situata konkrete, mbështetja e aleatëve dhe rrethanat personale.
Gjetjet ngrenë gjithashtu një tjetër fakt: brenda NATO-s ekzistojnë dallime të mëdha në perceptimin e rrezikut dhe gatishmërinë e popullsive për të mbrojtur vendet e tyre në rast konflikti. /skyweb.al
