Volkswagen po shqyrton rikthimin në industrinë e mbrojtjes, teksa është në bisedime me kompaninë izraelite Rafael Advanced Defence Systems për të kthyer një fabrikë prodhimi makinash në Gjermani në një qendër për prodhimin e komponentëve të sistemeve të mbrojtjes ajrore.
Sipas burimeve të njohura me planin, bëhet fjalë për fabrikën e Osnabrück, e cila rrezikon mbylljen për shkak të rënies së fitimeve dhe presionit në rritje nga konkurrenca kineze dhe tranzicioni i ngadaltë drejt automjeteve elektrike.
Plani parashikon që kjo fabrikë të prodhojë pjesë për sistemin izraelit Iron Dome, përfshirë kamionë të rëndë për transportin e raketave, lëshues dhe gjeneratorë energjie, por jo vetë raketat.
Prodhimi mund të nisë brenda 12 deri në 18 muajve, nëse punonjësit pranojnë kalimin nga industria e makinave te ajo e armëve.
Qëllimi kryesor është ruajtja e 2,300 vendeve të punës në këtë fabrikë, me mundësi edhe zgjerimi në të ardhmen.
Projekti mbështetet edhe nga qeveria gjermane, ndërsa konsiderohet një nga rastet më të qarta të orientimit të industrisë automobilistike drejt sektorit të mbrojtjes, i cili po rritet me shpejtësi.
Kjo lëvizje shënon një kthim të rëndësishëm për Volkswagen në prodhimin ushtarak, pasi kompania kishte prodhuar mjete dhe pajisje për ushtrinë gjermane gjatë Luftës së Dytë Botërore.
Rafael planifikon gjithashtu ngritjen e një strukture të veçantë në Gjermani për prodhimin e raketave, ndërsa synon të shesë sistemin Iron Dome në vende të ndryshme europiane, në një kohë kur kontinenti po rrit ndjeshëm shpenzimet për mbrojtjen pas luftës në Ukrainë.
Gjermania pritet të shpenzojë mbi 500 miliardë euro për mbrojtjen deri në fund të dekadës, me fokus të veçantë në sistemet e mbrojtjes ajrore.
Ndërkohë, ekspertët kanë ngritur pikëpyetje mbi përshtatshmërinë e Iron Dome për mbrojtjen e Europës nga kërcënime me rreze më të gjatë.
Nga ana tjetër, Volkswagen ka konfirmuar se është në diskutime me aktorë të ndryshëm për të ardhmen e fabrikës, por ka theksuar se nuk ka ende një vendim përfundimtar. /FT
