Administrata Tatimore bën me dije se deri tani mbi 89 mijë tatimpagues kanë plotësuar Deklaratën Individuale Vjetore të të Ardhurave për vitin 2025, ndërsa afati përfundimtar i deklarimit dhe pagesës është 31 marsi 2026.
Sipas të dhënave zyrtare, këtë vit pritet që numri i deklaruesve të arrijë në rreth 200 mijë individë, nga 140 mijë që deklaruan një vit më parë. Rritja lidhet me aplikimin për herë të parë të zbritjeve tatimore për fëmijët në ngarkim dhe shpenzimet arsimore.
Administrata sqaron se këto lehtësime përfshijnë jo vetëm individët me të ardhura mbi 1.2 milionë lekë në vit, por edhe ata nën këtë prag, të cilët nxiten të deklarojnë vullnetarisht për të përfituar rimbursim në rast se rezultojnë me tepricë kreditore.
Detyrim për deklarim kanë individët që kanë realizuar të ardhura bruto vjetore mbi 1.2 milionë lekë nga të gjitha burimet, ata që kanë pasur më shumë se një marrëdhënie punësimi gjatë vitit, si dhe personat që kanë përfituar mbi 50 mijë lekë të ardhura për të cilat nuk është mbajtur tatim.
Ndërkohë, Tatimet bëjnë me dije se janë plotësuar edhe rreth 80 mijë deklarata për të ardhurat personale nga biznesi, si dhe 15 mijë e 306 deklarata për tatimin mbi të ardhurat e korporatave.
Autoritetet u bëjnë thirrje qytetarëve që të respektojnë afatin ligjor, duke paralajmëruar se mosdeklarimi sjell penalitete sipas legjislacionit në fuqi.
