Apple pritet të prezantojë iPhone-in e parë me ekran të palosshëm menjëherë pas lançimit të iPhone 18, duke shënuar një nga ndryshimet më të mëdha në historinë e këtij produkti. Sipas ekspertëve të teknologjisë, ky model i ri – që mund të quhet iPhone Fold ose Ultra, ka potencialin të sjellë një transformim të rëndësishëm në tregun e smartfonëve.
Kompania mund ta prezantojë këtë pajisje pas muajit shtator, në vijim të eventit tradicional të iPhone 18. Një lançim i tillë mund të përkojë edhe me përvjetorin e 50-të të themelimit të Apple nga Steve Jobs, i cili daton më 1 prill 1976.
Sipas një analize të Barclays në fillim të marsit, iPhone-i me ekran fleksibël ishte planifikuar fillimisht për gjysmën e parë të vitit 2026. Megjithatë, prezantimi mund të shtyhet për në pjesën e dytë të vitit, ndërsa dalja në treg pritet në fillim të vitit pasardhës.
Të dhënat nga IDC sugjerojnë se hyrja e Apple në segmentin e telefonëve të palosshëm mund t’i sigurojë kompanisë mbi 20% të tregut që në vitin e parë. Aktualisht, ky sektor dominohet nga Samsung me rreth 40% të tregut, ndërsa Huawei mban rreth 30%. /skyweb.al
