Seanca e sotme parlamentare është shoqëruar me tensione të forta mes mazhorancës dhe opozitës, pas deklaratave të ambasadës amerikane se Shqipëria mund të jetë e kërcënuar nga Irani.
Gjatë debatit, ministri Taulant Balla është përplasur ashpër me deputetin Fatmir Mediu, duke e akuzuar këtë të fundit për tragjedinë e Gërdecit dhe duke kërkuar që ai të japë llogari para drejtësisë.
“Jep hesap para drejtësisë, mos më hajde këtu fare! Ti shko jep hesap para drejtësisë, ke vrarë 26 veta. Na bën si përfaqësues i amerikanëve ka 20 vjet. Mjaft na bërë sikur je përfaqësues i kongresit”, iu drejtua Balla, Mediut nga foltorja e Kuvendit.
Nga ana tjetër, Mediu reagoi shkurt gjatë përplasjes duke thënë “boll o boll”.
Debati erdhi pasi më herët Mediu kërkoi mbledhjen e Këshillit të Sigurimit Kombëtar për të diskutuar rrezikun e mundshëm ndaj Shqipërisë, pas paralajmërimeve të ambasadës amerikane.
Përplasjet në Kuvend vijojnë të thellohen, ndërsa çështja e sigurisë dhe raportet me partnerët ndërkombëtarë po përdoren si pika kryesore për debat politik mes palëve.
