Një variant i ri i COVID-19, i quajtur BA.3.2 dhe i njohur si “Cicada”, duket se po prek më shumë fëmijët, por pa shkaktuar sëmundje më të rëndë as tek ata dhe as tek të rriturit, shkruan CNN.
Ky variant është pjesë e familjes Omicron dhe është zbuluar në disa vende, por po qarkullon në nivele të ulëta. Shkencëtarët thonë se nuk ka ndikim të madh dhe vaksinat ekzistuese ende ofrojnë mbrojtje, ndaj nuk duket e nevojshme një vaksinë e re për momentin.
BA.3.2 ka shumë mutacione, por ka humbur pjesërisht aftësinë për t’u lidhur fort me qelizat e trupit, gjë që e bën më pak të rrezikshëm dhe më pak të përhapur se variantet e tjera.
Mendohet se ky variant mund të jetë zhvilluar gjatë një infeksioni të gjatë tek një person me imunitet të dobët, duke ndryshuar gradualisht para se të rishfaqej.
Në disa vende si Gjermania pati një rritje të rasteve, por tani duket në rënie. Edhe pse mund të përhapet më tej, ekspertët besojnë se nuk do të shkaktojë valë të mëdha infeksionesh.
Në përgjithësi, ky variant është më shumë me interes për studim shkencor sesa një kërcënim serioz për shëndetin publik. /skyweb.al
