Kompanitë ajrore europiane po kërkojnë ndërhyrje urgjente nga institucionet e Bashkimit Europian për të përballuar pasojat e krizës në Lindjen e Mesme, e cila po ndikon drejtpërdrejt në operacionet dhe kostot e tyre.
Shoqata Airlines for Europe (A4E), që përfaqëson shumicën e kompanive të mëdha ajrore në kontinent, i ka bërë thirrje Komisionit Europian për masa të përkohshme mbështetëse.
Ndër propozimet kryesore është pezullimi i përkohshëm i taksave të aviacionit në të gjithë Europën, një masë që sipas industrisë do të lehtësonte presionin financiar mbi kompanitë në një moment të vështirë. Po ashtu, kërkohet krijimi i një mekanizmi në nivel të BE-së për monitorimin e furnizimit me karburant aviacioni, në mënyrë që të shmangen mungesat dhe çrregullimet në treg.
Një tjetër shqetësim lidhet me detyrimin që kanë disa kompani për të marrë karburant shtesë nga aeroporte të tjera, për shkak të pasigurisë në furnizim në disa zona. A4E kërkon lehtësira edhe për këtë praktikë, e njohur si “tankering”, e cila rrit ndjeshëm kostot operative.
Drejtoresha menaxhuese e A4E, Ourania Georgoutsakou, theksoi se këto janë masa të përkohshme për të përballuar situatën aktuale, por paralelisht nevojitet edhe një planifikim afatgjatë për të përgatitur industrinë për kriza të ngjashme në të ardhmen.
Megjithatë, mundësia për të zbatuar një pjesë të këtyre kërkesave mbetet e kufizuar, pasi Bashkimi Europian nuk ka kompetencë direkte mbi taksat e aviacionit, të cilat vendosen nga shtetet anëtare. Kjo do të thotë se çdo lehtësim fiskal do të varet nga vendimet individuale të qeverive kombëtare, në një moment kur industria ajrore po përballet me një nga sfidat më të mëdha të viteve të fundit. /skyweb.al
