Një problem i rëndë teknik në sistemet e radiokomunikimit ka paralizuar që prej mëngjesit të së dielës trafikun ajror në Greqi, duke shkaktuar kaos në aeroportet e vendit dhe pezullim të gjerë të fluturimeve. Defekti ka prekur drejtpërdrejt komunikimin mes pilotëve dhe kontrollit të trafikut ajror, çka ka detyruar autoritetet greke të mbyllin përkohësisht FIR Athinës, hapësira ajrore nën përgjegjësinë e Greqisë.
Situata më problematike është regjistruar në Eleftherios Venizelos, ku dhjetëra avionë kanë mbetur të bllokuar në pistë, ndërsa nisjet dhe mbërritjet janë anuluar ose shtyrë pa një afat të qartë rikthimi në normalitet. Të njëjtat probleme janë raportuar edhe në aeroportet e tjera kryesore të vendit, përfshirë Selanikun, Heraklionin dhe destinacione të tjera rajonale.
Sipas informacioneve zyrtare, defekti ndodhet në sistemet qendrore të radiofrekuencave që përdor Shërbimi i Aviacionit Civil i Greqisë, duke e bërë të pamundur garantimin e komunikimit të sigurt dhe të vazhdueshëm mes pilotëve dhe qendrave të kontrollit. Për këtë arsye, autoritetet kanë lejuar vetëm vijimin e fluturimeve që ndodheshin tashmë në ajër, ndërsa nisjet nga aeroportet greke janë bërë pothuajse të pamundura.
Kompani ajrore dhe autoritete operacionale po përpiqen të menaxhojnë situatën përmes riprogramimit të fluturimeve, në një ditë që konsiderohet veçanërisht e ngarkuar, sidomos për shkak të kthimit të udhëtarëve nga pushimet. Megjithatë, pamundësia për të kryer nisje nga Greqia ka sjellë pasoja zinxhir, duke ndikuar edhe fluturimet që ishin planifikuar të vinin nga aeroportet e huaja drejt vendit.
Ndërkohë, pasagjerët që janë paraqitur herët në aeroport përballen me pamje të mbipopullimit, radhë të gjata dhe pasiguri të plotë mbi fatin e udhëtimeve të tyre. Autoritetet greke bëjnë me dije se ekipet teknike janë në punë intensive dhe se Shërbimi i Aviacionit Civil është në kontakt të vazhdueshëm me operatorë të telekomunikacionit për rikthimin e funksionimit të sistemit, por deri tani nuk ka një njoftim zyrtar për kohën e saktë të zgjidhjes së problemit.
Udhëtarëve u rekomandohet të mos shkojnë në aeroporte pa u informuar më parë nga linjat ajrore dhe të ndjekin njoftimet zyrtare, ndërsa autoritetet pranojnë se situata ka krijuar një nga ndërprerjet më serioze të operimeve ajrore në Greqi në vitet e fundit. /skyweb.al
