Banka Evropiane për Rindërtim dhe Zhvillim po përgatit hapjen e procedurës ndërkombëtare të prokurimit për ndërtimin e centralit diellor në Belsh, një investim i Korporatës Elektroenergjetike Shqiptare (KESH). Tenderi do të hapet zyrtarisht më 20 nëntor dhe do të administrohet nga vetë BERZH-i, si financuese kryesore e projektit.
Parku solar do të ketë kapacitet të instaluar prej 50 MWp dhe një kosto totale prej 40 milionë eurosh. Skema e financimit parashikon: 30 milionë euro kredi të BERZH me garanci sovrane; 8 milionë euro grant nga Korniza e Investimeve të Ballkanit Perëndimor (WBIF); 2 milionë euro financim nga KESH
Për shkak të garancisë sovrane, Kuvendi po shqyrton aktualisht projektligjin që i hap rrugë marrëveshjes së garancisë shtetërore.
Energjia e prodhuar nga impianti do të shërbejë për rritjen e kapaciteteve gjeneruese të KESH-it dhe përmbushjen e Detyrimit të Shërbimit Publik, duke ulur varësinë nga importet, të cilat sot mbulojnë rreth 30% të konsumit vjetor.
Prodhimi i parkut diellor në Belsh pritet të përfaqësojë rreth 1% të prodhimit kombëtar të energjisë elektrike. /skyweb.al
