Ky vit është shoqëruar me një rritje të ndjeshme të konsumit nga ana e qytetarëve shqiptarë por edhe turistëve të huaj që vizitojnë vendin tonë.
Tregues për këtë janë të ardhurat e mbledhura nga Tatimi mbi Vlerën e Shtuar nga administrata tatimore, çka tregon qarkullimin e produkteve dhe shërbimeve brenda vendit përmes faturave fiskale dhe 20% e paguar nga konsumatorët.
Përgjatë periudhës Janar-Korrik, tatimet kanë mbledhur nga TVSH e brendshme afro 39.2 miliardë lekë, apo 392 milionë euro.
Krahasuar me të njëjtën periudhë të një viti më parë, ku u arkëtuan 327 milionë euro nga ky zë, ka një rritje prej 65 milionë euro, e cila për ekonominë shqiptare, nuk është e vogël.
Por si është shtrirë konsumi sipas muajve? Nëse i referohemi të dhënave të TVSH- së së arkëtuar për çdo muaj gjatë 2025-ës, vihet re se rekordi i të ardhurave regjistrohet në Janar, me afro 113 milionë euro të hyra në buxhet. Kjo shifër konsiderohet si suprizuese, duke qenë se Janari është zakonisht muaji kur konsumatorët kufizohen për shkak të shpenzimeve të larta gjatë festave të Dhjetorit.
Përgjatë muajve shkurt-maj, të ardhurat variojnë nga 40-50 milionë euro në muaj, ndërsa Qershori ka një rënie të konsiderueshme, ku janë arkëtuar vetëm 27 milionë euro, shifra më e ulët e gjithë vitit. Ndërsa në muajin Korrik, i cili konsiderohet edhe si kulmi i sezonit, janë arkëtuar 60 milionë euro nga TVSH.
Në raport me 2024, TVSH ka rënie vetëm në muajin Shkurt dhe Qershor. Ekspertët e turizmit kanë argumentuar se këtë vit sezoni veror ka nisur më vonë se sa pritej, duke bërë që qershori të ishte i vakët.
Ndër faktorët që kanë ndikuar në këtë perfomancë është tendenca drejt një turizmi gjithëvjetor, ku tashmë, përpos interesit për zonat bregdetare, të huajt kanë pasur interes të shtuar për zonat historike dhe malore. Duke qenë se kushtet atmosferike kanë qenë favorizuese, është nxitur ndjeshëm lëvizshmëria si nga të huajt edhe nga vendasit, duke prodhuar konsum të lartë.
Konsumi ushqimor ditor për një turist arrin mesatarisht 2- 2.5 herë më shumë sesa konsumi për frymë i një banori vendas në të njëjtat zona (bazuar në analiza të tregut HORECA, Shoqata e Gastronomisë, 2024).
Po ashtu një zë tjetër që ka ndikuar në këtë performancë pozitive të të ardhurave ka qenë dhe reforma e pagave në administratë, ku nga 1 Korriku 2024, pagat u rritën sërish për një sërë kategorish që paguhen nga buxheti i shtetit, duke u dhënë kështu shumë mundësi qytetarëve për të shpenzuar. Kjo reformë ka vënë në lëvizje edhe sektorin privat duke nxitur në mënyrë indirekte lëvizje në paga, çka ka sjellë dhe konsum të shtuar. /tvscan
