Organizatat kryesore të biznesit në hapësirën mbarëshqiptare kanë reaguar me një deklaratë të përbashkët, duke ngritur shqetësimin për përshkallëzimin e krizës së karburanteve dhe pasojat e saj të drejtpërdrejta në ekonomi.
Sipas tyre, rritja e vazhdueshme e çmimeve, e ndikuar nga tensionet gjeopolitike dhe kriza globale e energjisë, po ushtron presion të fortë mbi aktivitetin ekonomik, duke goditur njëkohësisht bizneset dhe konsumatorët.
Në deklaratë theksohet se karburanti mbetet një nga inputet më strategjikë për ekonominë, ndërsa shtrenjtimi i tij po përkthehet në rritje të kostove të prodhimit dhe shërbimeve, çmime më të larta në treg, ulje të fuqisë blerëse dhe dobësim të konkurrueshmërisë së bizneseve në rajon.
Përfaqësuesit e biznesit paralajmërojnë se situata po ndikon negativisht edhe në klimën e investimeve, duke shtyrë planet për zgjerim dhe duke rritur rrezikun e zhvendosjes së kapitalit drejt tregjeve më të qëndrueshme.
Përballë kësaj situate, organizatat kërkojnë ndërhyrje të menjëhershme nga qeveritë përmes politikave fiskale lehtësuese dhe mekanizmave stabilizues, përfshirë edhe vendosjen e çmimeve tavan për të mbrojtur stabilitetin ekonomik dhe social.
Ndër kërkesat kryesore të biznesit janë rishikimi fleksibël i barrës fiskale mbi karburantet, rritja e transparencës në përcaktimin e çmimeve, forcimi i kontrollit të tregut dhe lufta kundër abuzimeve.
Po ashtu kërkohet mbështetje direkte për sektorët më të ekspozuar si transporti, bujqësia, agropërpunimi, industria prodhuese, fasoneria, shërbimet dhe turizmi, të cilët po përballen me rritje të ndjeshme të kostove dhe rrezikojnë t’i transferojnë ato te konsumatori.
Në plan më afatgjatë, biznesi kërkon krijimin e rezervave strategjike të naftës, diversifikimin e burimeve energjetike dhe rritjen e investimeve në energji alternative dhe efikasitet energjetik, si mënyra për të ulur varësinë nga importet.
Në përfundim, organizatat bëjnë thirrje për një dialog të hapur dhe të vazhdueshëm me qeveritë, me synimin për të hartuar politika të zbatueshme që mbështesin ekonominë, ruajnë vendet e punës dhe garantojnë stabilitet në të gjithë hapësirën mbarëshqiptare. /skyweb.al
