Agjencia e Inteligjencës Financiare ka zbërthyer një skemë të dyshuar të qarkullimit të fondeve ndërkombëtare përmes shoqërive të regjistruara në Shqipëri si kompani marketingu online, një formë aktiviteti që në praktikën shqiptare është përdorur shpesh edhe si mbulesë për call center-a.
Rasti është përfshirë në Raportin Vjetor 2025 të AIF si një nga tipologjitë e dërguara për investigim të mëtejshëm në organet ligjzbatuese.
Sipas raportit, bëhet fjalë për 11 shoqëri të regjistruara në Shqipëri, të cilat kanë përfituar transferta nga vende të ndryshme të Europës dhe Azisë në vlerën totale 3.74 milionë euro. Formalisht, aktiviteti i tyre ishte ofrimi i shërbimeve të marketingut online.
Por analiza e AIF ka evidentuar se këto kompani nuk vepronin të shkëputura nga njëra-tjetra. Përkundrazi, mes tyre kishte lidhje të dukshme, si ushtrimi i të njëjtit aktivitet, përfshirja e të njëjtëve individë në disa role dhe përsëritja e personave si administratorë, ortakë apo përfaqësues në shoqëri të ndryshme. Pikërisht kjo strukturë ngriti dyshime se aktiviteti i deklaruar mund të shërbente si fasadë për qarkullimin e fondeve nga jashtë.
Një tjetër element që e bën skemën më të dyshimtë është jetëgjatësia shumë e shkurtër e këtyre subjekteve. Sipas raportit, kompanitë janë regjistruar gjatë vitit 2024 dhe brenda një periudhe gjashtëmujore, ose brenda të njëjtit vit, rezultojnë të jenë çregjistruar. Ky model, ku subjekte të reja hapen shpejt, marrin transferta të mëdha dhe më pas mbyllen, është një nga treguesit klasikë të kompanive që përdoren për lëvizje fondesh, pa pasur një aktivitet të qëndrueshëm ekonomik.
Në vijim të analizës bankare, AIF ka identifikuar vendet nga ku kanë ardhur transfertat me vëllimin më të lartë dhe ka komunikuar me Njësitë e Inteligjencës Financiare partnere në 7 vende të ndryshme. Nga informacioni i marrë prej tyre janë evidentuar disa anomali të rëndësishme, përfshirë qarkullim fondesh shumë herë më të lartë se deklarimet, përdorim të llogarive për qëllime tranzitore dhe transferim të menjëhershëm të fondeve drejt shteteve të tjera pas kreditimit.
Raporti evidenton gjithashtu se transfertat ishin jashtë profilit apo fushës së aktivitetit të subjekteve dhe nuk shoqëroheshin me dokumentacion justifikues të mjaftueshëm. Sipas AIF, edhe subjektet dërguese jashtë vendit kishin zhvilluar aktivitet në të njëjtën periudhë me kompanitë e regjistruara në Shqipëri, ndërsa pjesa më e madhe e tyre rezultonin të çregjistruara.
Në këtë mënyrë, skema dyshohet se funksiononte përmes krijimit të disa kompanive me profil “marketing online”, të cilat merrnin pagesa nga jashtë, qarkullonin fonde në shuma të larta dhe më pas i lëviznin ato drejt juridiksioneve të tjera. Përdorimi i të njëjtëve individë në disa kompani krijonte mundësinë që drejtuesit realë të fshiheshin pas strukturave të ndryshme formale, duke e bërë më të vështirë gjurmimin e kontrollit dhe të origjinës së parave.
AIF ka bashkëpunuar edhe me organet tatimore për këtë rast. Në vijim, organi tatimor ka informuar se disa nga këto shoqëri janë referuar në organet ligjzbatuese për veprat penale të fshehjes së të ardhurave dhe mospagimit të taksave e tatimeve.
Raporti nuk përdor shprehimisht termin “call center”, por aktiviteti i deklaruar si marketing online lidhet me një formë regjistrimi që në Shqipëri është përdorur shpesh nga struktura që ofrojnë shërbime telefonike, digjitale apo shitje në distancë për klientë jashtë vendit. Pikërisht për këtë arsye, rasti ngre dyshime mbi mënyrën se si kompani të tilla mund të përdoren jo vetëm për aktivitet tregtar, por edhe si mekanizëm për të qarkulluar fonde ndërkombëtare dhe për të shmangur detyrimet fiskale.
Tipologjia e publikuar nga AIF tregon se skemat e dyshuara të pastrimit të parave nuk kufizohen më vetëm te ndërtimi, pasuritë e paluajtshme apo transaksionet cash. Ato po zhvendosen edhe drejt sektorëve digjitalë, ku aktiviteti formal është më i vështirë për t’u verifikuar, pagesat vijnë nga jashtë dhe kompanitë mund të hapen e të mbyllen brenda pak muajsh.
