Pastrimi i parave në Shqipëri duket se po hyn në një fazë më të sofistikuar, ku fondet e dyshuara nuk kalojnë më vetëm përmes blerjes së apartamenteve, tokave apo bizneseve, por edhe përmes veprave të artit.
Agjencia e Inteligjencës Financiare ka evidentuar në raportin vjetor 2025 një rast ku para të ardhura nga jashtë vendit dhe të lidhura me kompani offshore janë përdorur për blerje pasurish të paluajtshme dhe veprash arti në Shqipëri.
Rasti është përfshirë nga AIF në tipologjitë e dërguara për hetim në organet ligjzbatuese. Sipas raportit, dy shtetase me shtetësi shqiptare dhe kombësi të huaj kanë kryer gjatë vitit 2025 blerje në territorin shqiptar, duke përdorur fonde të ardhura nga juridiksione të ndryshme dhe biznese të regjistruara në vende me lehtësi fiskale.
AIF nuk jep shumën totale të investimeve, por e përshkruan rastin si blerje në vlera të larta. Elementi më i rëndësishëm nuk është vetëm vlera e transaksioneve, por mënyra se si janë sjellë fondet në Shqipëri.
Paratë kanë kaluar përmes juridiksioneve me lehtësi fiskale dhe kompanive të regjistruara jashtë vendit, duke e bërë më të vështirë identifikimin e origjinës reale të tyre.
Përdorimi i veprave të artit si kanal investimi e bën rastin edhe më të ndjeshëm. Ndryshe nga pasuritë e paluajtshme, ku vlera mund të krahasohet më lehtë me tregun, veprat e artit kanë një vlerë më subjektive dhe më të vështirë për t’u verifikuar.
Pikërisht për këtë arsye, ky sektor konsiderohet i ekspozuar ndaj skemave ku paratë me burim të paqartë mund të futen në ekonomi përmes blerjeve formalisht të ligjshme.
Në analizën e saj, AIF ka marrë në konsideratë përdorimin e fondeve ndërkombëtare për blerje pasurish të paluajtshme dhe veprash arti, burimin e fondeve nga aktivitete biznesi me risk të shtuar, dyshimet për përdorimin e kompanive të regjistruara në vende me lehtësi fiskale për fshehjen e origjinës së parave, si edhe përfshirjen e disa juridiksioneve në qarkullimin e fondeve.
Një tjetër element që ka shtuar dyshimet është lidhja familjare me individë të përfshirë në aktivitet kriminal të njohur.
Raporti nuk publikon emra personash, kompani apo vende konkrete, por thekson se në qarkullimin e fondeve janë përfshirë vendi i rezidencës, vendi nga ku janë urdhëruar transfertat dhe vendet ku operonin bizneset e lidhura me fondet.
Kjo e bën rastin një skemë më komplekse se pastrimi klasik i parave përmes cash apo blerjes së drejtpërdrejtë të pronave.
Në këtë rast, dyshimi ngrihet mbi një zinxhir ndërkombëtar ku fondet lëvizin përmes kompanive offshore dhe më pas përfundojnë në Shqipëri në formën e investimeve në prona dhe vepra arti.
Në përfundim, AIF e ka dërguar rastin për investigim të mëtejshëm në organet e zbatimit të ligjit. /skyweb.al
