Çdo qytetar shqiptar që kryen transaksione në kriptomonedha, brenda apo jashtë vendit, do të raportohet në kohë reale tek administrata Tatimore.
Drejtoria e Përgjithshme e Tatimeve do të shkëmbejë në kohë reale me autoritetet tatimore të vendeve të Bashkimit Europian të dhënat për transaksionet me kriptomonedhat, që kryhen nga shtetas shqiptarë apo ata të Bashkimit Europian.
Detyrimi buron nga një projektligj i ri, që është propozuar nga ministria e Financave. Ky draft ngarkon administratën e Tatimeve të monitorojë në kohë reale transaksionet me kriptomonedhat dhe të shkëmbejë informacion me vendet e Bashkimit Europian.
“Projektligji adreson nevojën për krijimin e një kuadri të posaçëm ligjor që rregullon raportimin dhe shkëmbimin automatik të informacionit mbi kripto-asetet, një fushë e cila nuk mbulohet nga legjislacioni aktual shqiptar mbi shkëmbimin automatik të informacionit për llogaritë financiare,” thuhet në relacionin e projektligjit.
Kripto-asetet kanë fituar përdorim të gjerë në nivel ndërkombëtar dhe karakteri i tyre ndërkufitar krijon mundësi për transferimin e pasurisë jashtë mekanizmave tradicionalë të raportimit financiar.
Sipas ministrisë së Financave, në mungesë të një kuadri të harmonizuar raportimi, administratat tatimore kanë vështirësi në identifikimin e pronësisë së kripto-aseteve dhe të ardhurave që burojnë prej tyre, duke rritur rrezikun e evazionit fiskal.
Projektligji i propozuar detyron platformat që ofrojnë shërbimet e pagesave apo konvertimit të Kripto-Aseteve të zbatojnë proçedurat e kujdesit të duhur, të identifikojnë përdoruesit e raportueshëm, të mbledhin informacion dhe të raportojnë në mënyrë periodike pranë Autoritetit Tatimor për transaksionet e kriptomonedhave.
Njëkohësisht, projektligji përcakton kompetencat e Drejtorisë së Përgjithshme të Tatimeve për administrimin e sistemit të raportimit, regjistrimin e operatorëve të kripto-aseteve, kontrollin e përmbushjes së detyrimeve ligjore dhe shkëmbimin automatik të informacionit me autoritetet kompetente të shteteve anëtare të Bashkimit Evropian. /kapitali.al
