Një kapitull i ri për fluturimet ultra të gjata po hapet në Australi. Avioni i ri Airbus A350-1000ULR, i projektuar posaçërisht për programin ambicioz “Project Sunrise” të Qantas, ka mbërritur në Melbourne pas një fluturimi prej 19 orësh e 12 minutash nga Toulouse, Francë.
Avioni është pjesë e projektit me të cilin Qantas synon të realizojë fluturime direkte pa ndalesë nga Sydney dhe Melbourne drejt Londrës dhe New Yorkut, duke eliminuar ndalesat që aktualisht nevojiten në këto udhëtime.
Gjatë fluturimit drejt Australisë, A350-1000ULR përshkoi më shumë se 15 mijë kilometra, duke demonstruar kapacitetet e avionit të përshtatur për distanca jashtëzakonisht të gjata.
Fluturimi tërhoqi një interes të jashtëzakonshëm edhe mes të apasionuarve pas aviacionit. Sipas të dhënave të Flightradar24, më shumë se 50 mijë persona po e ndiqnin avionin në kohë reale gjatë udhëtimit, ndërsa numri u afrua në 70 mijë në momentin e mbërritjes.
“Project Sunrise” konsiderohet një nga projektet më ambicioze të aviacionit civil, pasi synon të bëjë të mundur lidhjen e Australisë me disa prej metropoleve më të mëdha të botës përmes fluturimeve që mund të zgjasin rreth 20 orë.
Avionët Airbus A350-1000 të Qantas do të kenë konfigurim të posaçëm për këto udhëtime, ku rëndësi e veçantë i është kushtuar komfortit të pasagjerëve gjatë qëndrimit për shumë orë në ajër.
Me nisjen e “Project Sunrise”, udhëtimi mes Australisë dhe Europës apo bregut lindor të SHBA-së pritet të ndryshojë ndjeshëm, duke shmangur tranzitet dhe duke krijuar disa prej linjave më të gjata direkte në botë.
