Një defekt në sistemin e furnizimit me ujë ka shkaktuar probleme të shumta këtë të diel në aeroportin Gatwick të Londrës, ku mijëra pasagjerë janë përballur me mungesë uji në të dy terminalet.
Shkak është bërë një ndërprerje e energjisë elektrike në impiantet e kompanisë SES Water, e cila solli uljen e presionit dhe ndërprerjen e përkohshme të furnizimit në disa zona të jugut të Anglisë.
Problemi preku edhe Gatwick, aeroportin e dytë më të madh në Mbretërinë e Bashkuar. Mungesa e ujit solli vështirësi në funksionimin e tualeteve, ndërsa në disa ambiente nuk kishte as ujë të rrjedhshëm për të larë duart.
Situata detyroi gjithashtu një numër kafenesh dhe restorantesh të pezullonin shërbimin, pasi nuk mund të përgatisnin pije të ngrohta apo ushqime që kërkonin përdorimin e ujit.
Në disa pika ushqimore u ofruan vetëm produkte të gatshme, si sanduiçe dhe ushqime të paketuara.
Administrata e aeroportit konfirmoi se furnizimi me ujë ishte ndërprerë në të dy terminalet dhe kërkoi ndjesë për shqetësimet e krijuara.
“Problemi lokal me furnizimin me ujë vazhdon të shkaktojë ndërprerje të konsiderueshme. Aktualisht nuk ka ujë në asnjërin prej terminaleve”, bëri të ditur Gatwick.
Stafi i aeroportit është angazhuar për të ndihmuar pasagjerët, ndërsa disa restorante partnere kanë hapur ambiente shtesë për qëndrimin e udhëtarëve.
Ndërkohë, në rrjetet sociale janë shtuar ankesat për mungesën e informacionit, vështirësitë për të gjetur ujë të ambalazhuar, radhët e gjata dhe mbylljen e pikave të ushqimit.
SES Water ka njoftuar se po punon për rikthimin sa më të shpejtë të furnizimit normal.
Edhe aeroporti Gatwick tha se po bashkëpunon ngushtë me kompaninë e ujësjellësit dhe se do të njoftojë pasagjerët sapo të ketë zhvillime të reja. /skyweb.al
