Punimet në gjashtë fazat e para të aksit Elbasan–Rrogozhinë, pjesë e Korridorit VIII, kanë hyrë në fazën finale. Sipas Autoritetit Rrugor Shqiptar (ARRSH), realizimi fizik i përgjithshëm i këtyre loteve ka arritur në 87%, ndërsa aktualisht puna është përqendruar kryesisht në shtrimin e shtresave asfaltike përgjatë rreth 15 kilometrave të segmentit.
Gjashtë lotet përfshijnë rreth 20 kilometra të aksit të ri, nga Elbasani deri në afërsi të Peqinit. Krahas punimeve në trupin e rrugës, në disa prej segmenteve po vijon puna edhe për veprat e mëdha të artit. Sipas ARRSH-së, shtresat asfaltike po aplikohen në dy ura, ndërsa në dy ura të tjera punimet për mbistrukturën janë pranë përfundimit.
Përfundimi i gjashtë fazave të para është parashikuar brenda vitit 2026. Në total, aksi Elbasan–Rrogozhinë do të ketë një gjatësi prej 40.7 kilometrash.
Segmenti nis pranë ish-Kombinatit Metalurgjik në Elbasan, ku do të lidhet me bypass-in e qytetit, dhe vijon deri në Lekaj, ku bashkohet me autostradën ekzistuese të Korridorit Blu. Traseja shtrihet në territorin e bashkive Elbasan, Peqin dhe Kavajë.
Pas përfundimit, rruga do të ketë nga dy korsi në secilin drejtim, duke krijuar një lidhje të re me standarde të larta infrastrukturore përgjatë Korridorit VIII. Sipas dokumenteve të projektit, shpejtësia e projektuar në segmente të ndryshme të aksit parashikohet nga 90 deri në 140 km/orë.
Aksi Elbasan–Rrogozhinë është një nga pjesët kryesore të Korridorit VIII, që shërben si një lidhje e rëndësishme lindje–perëndim. Nga Elbasani, korridori vijon drejt Qafë-Thanës, ku paralelisht po zhvillohen edhe projekte të tjera infrastrukturore për përmirësimin e këtij korridori strategjik.
