Ngërçi me pagat në sistemin e drejtësisë ka sjellë edhe bojkotin e parë nga administrata gjyqësore. Punonjësit dhe sekretarët e Dhomës Civile të Gjykatës së Tiranës kanë ndërprerë shërbimet, duke kërkuar sqarime për vonesën e pagave të muajit gusht dhe për të ardhmen e tyre.
Administrata ka njoftuar kryetarin e Gjykatës për bojkotin, ndërsa punonjësve u është komunikuar se një qëndrim zyrtar pritet pas mbledhjes së kryetarëve të të gjitha gjykatave, e planifikuar për orën 15:00 në Gjykatën e Lartë.
Ndërkohë, situata e pagave të bllokuara ka vënë në lëvizje edhe drejtuesit e prokurorive. Prokurori i Përgjithshëm, Olsian Çela, ka thirrur në takim drejtuesit e prokurorive të rretheve dhe përfaqësuesit e Shoqatës së Prokurorëve të Shqipërisë. Në takim janë ftuar edhe anëtarët e Këshillit të Lartë të Prokurorisë (KLP).
Ngërçi u krijua pasi Kuvendi nuk miratoi brenda afatit të 31 korrikut formulën e re të pagave të magjistratëve, sipas kërkesës së Gjykatës Kushtetuese. Pas skadimit të këtij afati, Këshilli i Lartë Gjyqësor (KLGJ) dhe KLP argumentuan se ishin të detyruar të zbatonin vetë vendimin e Kushtetueses. Për këtë arsye, ata përcaktuan pagën e re referuese në 222 mijë e 425 lekë, nga 156 mijë e 800 lekë që ishte më parë, ndërsa mbi këtë shumë aplikohet edhe shtesa prej 14 mijë lekësh për nivelin e kualifikimit.
Por Ministria e Financave nuk ekzekutoi listëpagesat e përllogaritura mbi bazën e rritjes së re. Ministria argumentoi se përcaktimi i formulës së pagave është kompetencë e Kuvendit dhe kërkoi që listëpagesat të ridërgoheshin sipas metodologjisë së mëparshme.
Për pasojë, pa pagat e muajit gusht kanë mbetur jo vetëm gjyqtarët dhe prokurorët, por edhe punonjësit e administratës së gjykatave dhe prokurorive.
Dy ditë më parë, kryeministri Edi Rama deklaroi se “dera e Thesarit të Shtetit”, ku kanë mbetur të bllokuara pagat e institucioneve të drejtësisë, nuk mund të hapet me forcë.
Nga ana tjetër, ministri i Drejtësisë, Toni Gogu, ka paralajmëruar se ngërçi pritet të zgjidhet në Kuvend me nisjen e sesionit të ri parlamentar.
