Kompania farmaceutike Bristol Myers Squibb ka njoftuar rezultate premtuese nga një provë klinike për një terapi të re kundër mielomës multiple, një formë e kancerit të gjakut që është veçanërisht e vështirë për t’u trajtuar.
Terapia eksperimentale, e quajtur arlo-cel, u testua te pacientë me sëmundje të avancuar, të cilët kishin provuar më parë katër lloje kryesore trajtimesh, por pa rezultate të qëndrueshme, sipas Reuters.
Sipas kompanisë, studimi arriti objektivin kryesor, duke treguar se një pjesë e konsiderueshme e pacientëve iu përgjigjën trajtimit. Te disa prej tyre, testet nuk zbuluan më shenja të dallueshme të kancerit.
Bristol Myers Squibb nuk ka publikuar ende shifrat e plota të rezultateve, por tha se përmirësimi ishte statistikisht domethënës dhe i rëndësishëm nga pikëpamja klinike. Të dhënat e detajuara pritet të prezantohen në një konferencë të ardhshme mjekësore.
Arlo-cel është një trajtim i llojit CAR-T, i cili përdor qelizat imunitare të vetë pacientit për të luftuar kancerin.
Në fillim, merren disa qeliza të sistemit imunitar nga pacienti dhe modifikohen në laborator. Qelizat programohen për të identifikuar një proteinë të caktuar, GPRC5D, që gjendet në qelizat e mielomës multiple. Më pas, këto qeliza të modifikuara i rikthehen pacientit për të sulmuar qelizat kancerogjene.
Ndryshe nga shumë trajtime të tjera, CAR-T administrohet si një infuzion i vetëm dhe është i personalizuar për çdo pacient.
Rezultatet e reja janë veçanërisht të rëndësishme pasi trajtimi po studiohet te pacientë që kanë mbetur pa shumë alternativa pasi terapitë e mëparshme nuk kanë funksionuar në mënyrë të qëndrueshme.
