Nga një histori e reklamuar si sukses i padiskutueshëm, AKSHI është kthyer papritur në një “eksperiencë negative” për Edi Ramën. Kryeministri ka ndryshuar kurs 180 gradë, duke pranuar për herë të parë se kompani private kanë përdorur kontratat e teknologjisë për të “mjelë” buxhetin e shtetit.
“Pas eksperiencës negative që ne kaluam me AKSHI-n, për shkak të disa qasjeve jo në linjë me standardet ligjore dhe etike të disa kompanive… standardet shumë të ulëta të kompanive private, të mësuara që të mjelin buxhetin e shtetit me shërbimet e tyre, në aspektin e ofrimit të mirëmbajtjes”, deklaroi Rama në Forumin e Dytë të Inovacionit.
Deklarata përbën distancimin më të fortë publik të kryeministrit nga skandali i AKSHI-t dhe nga personazhet që SPAK i ka vendosur në qendër të hetimeve, Ergys Agasi dhe Ermal Beqiri që5 kanë patur nën kontroll “de facto” këtë institucion.
Sipas dosjes së SPAK, Agasi dyshohet se orientonte grupin që kontrollonte tenderat e AKSHI-t, ndërsa Beqiri ishte një prej biznesmenëve të përfshirë në skemën e kontratave publike. Pra, “kompanitë private” që Rama akuzon sot për mjeljen e buxhetit nuk janë subjekte të panjohura, por aktorë të lidhur me sistemin e ngritur për vite me radhë rreth agjencisë më të rëndësishme të teknologjisë së qeverisë.
Pas arrestimit të Beqirit dhe Agasit, Rama duket se ka vendosur t’i braktisë publikisht të dy. Deri dje qeveria e paraqiste digjitalizimin si një nga sukseset e saj më të mëdha; sot kryeministri flet për shkelje ligjore, standarde të ulëta dhe kompani që zhvasnin shtetin.
Edhe largimi i Ilir Prodës dhe emërimi i Skënder Hitës në krye të Policisë së Shtetit u lexuan si sinjal i zhvillimeve të pritshme rreth Agasit, të cilat u finalizuan me arrestimitn e tij. /skyweb.al
