Qeveria ka hedhur për konsultim publik një projektvendim të Ministrisë së Bujqësisë që synon vendosjen e rregullave të reja për funksionimin e tregut të produkteve të peshkimit dhe akuakulturës, në përputhje me standardet e Bashkimit Europian.
Drafti parashikon krijimin e një mekanizmi të qartë për tregtimin e këtyre produkteve, me objektiv rritjen e besueshmërisë së produkteve shqiptare si në tregun vendas ashtu edhe në atë ndërkombëtar.
Në qendër të projektvendimit qëndron detyrimi për transparencë dhe gjurmueshmëri përmes etiketimit të produkteve të destinuara për konsum njerëzor.
Sipas parashikimeve, çdo produkt duhet të shoqërohet me informacion të plotë, që përfshin emrin tregtar dhe shkencor, metodën e prodhimit, zonën e kapjes ose kultivimit, mjetet e përdorura për peshkim, si dhe nëse produkti është shkrirë.
Kur kërkohet, duhet të pasqyrohet edhe data e jetëgjatësisë.
Këto rregulla do të jenë të detyrueshme jo vetëm për operatorët privatë, por edhe për institucionet publike që përdorin produkte peshkimi, si shkollat, spitalet, mensat dhe institucionet e vuajtjes së dënimit.
Për produktet e përziera, informacioni mbi metodën dhe zonën e origjinës do të përcaktohet sipas sasisë më përfaqësuese në përbërje. Ndërkohë, projektvendimi parashikon që ministria përgjegjëse të ketë të drejtën të përjashtojë nga detyrimi i etiketimit sasi të vogla që shiten drejtpërdrejt nga anijet e peshkimit.
Drafti vendos gjithashtu detyrime për organizatat e sektorit, të cilat duhet të hartojnë dhe të përditësojnë pranë ministrisë listën e emrave tregtarë dhe shkencorë të specieve që tregtohen. Zona e origjinës së produkteve do të përcaktohet sipas llojit të ujërave ose vendit të kultivimit dhe mund të paraqitet edhe përmes hartave apo piktogramëve.
Operatorëve u njihet e drejta të ofrojnë informacion shtesë mbi produktet, përfshirë të dhëna teknike, portin e zbarkimit, mjetet e përdorura, si dhe elementë mjedisorë apo socialë, me kusht që informacioni të jetë i verifikueshëm dhe të mos zëvendësojë të dhënat e detyrueshme.
Në projektvendim përcaktohet edhe roli i institucionit përgjegjës për shërbimet e peshkimit dhe akuakulturës, i cili do të mbledhë dhe analizojë të dhënat e tregut të brendshëm, do të kryejë anketa dhe studime mbi çmimet dhe do të garantojë aksesin e informacionit për palët e interesuara, në bashkëpunim me organizatat e sektorit.
Një tjetër element i rëndësishëm i draftit lidhet me mekanizmin e ruajtjes së produkteve, i cili synon stabilizimin e tregut në rastet kur nuk sigurohet shitja në çmimet e përcaktuara. Projektvendimi përcakton kushtet e ruajtjes, trajtimet e lejueshme, periudhat minimale dhe procedurat për rikthimin e produkteve në treg.
Po ashtu, parashikohen kriteret dhe procedurat për vendosjen e çmimeve kufi, të cilat shërbejnë për aktivizimin e mekanizmit ndërhyrës në treg, në rastet kur konstatohet luhatje e fortë e çmimeve. /skyweb.al
