Kompania ajrore kombëtare e Luksemburgut, Luxair, do të nisë nga viti i ardhshëm fluturimet direkte drejt Tiranës. Linja e re do të nisë më 29 mars 2027 dhe do të operojë gjatë gjithë vitit, me dy fluturime në javë, çdo të hënë dhe të premte.
Biletat kanë dalë tashmë në shitje, ndërsa çmimi më i ulët nis nga 129 euro vajtje-ardhje, pa përfshirë bagazhin, sipas njoftimit të Luxair, raporton skyweb.al.
Kjo do të jetë lidhja e parë e rregullt ajrore direkte ndërmjet Shqipërisë dhe Luksemburgut, e ofruar nga një kompani ajrore.
Luxair e lidh vendimin me rritjen e shpejtë të Shqipërisë si destinacion turistik, duke theksuar se Aeroporti Ndërkombëtar i Tiranës “Nënë Tereza” renditet aktualisht ndër aeroportet me rritjen më të shpejtë në Europë.
“Tirana ndërthur përvojën e një qyteti plot gjallëri me mundësinë për të vizituar lehtësisht disa nga zonat më tërheqëse të Shqipërisë”, thuhet në deklaratën e kompanisë.
Luxair përmend Sheshin “Skënderbej”, zonën e Bllokut dhe malin e Dajtit, ndërsa e cilëson kryeqytetin shqiptar si një pikënisje të përshtatshme për të eksploruar bregdetin, sitet e trashëgimisë botërore të UNESCO-s dhe pjesën jugore të Ballkanit.
Njoftimi për linjën e Tiranës vjen pak më shumë se një javë pasi Luxair konfirmoi shtyrjen e rikthimit të fluturimeve drejt Dubait.
Kjo linjë pritet të rifillojë jo më herët se më 6 shkurt 2027, në vend të tetorit 2026, siç ishte parashikuar më parë. /skyweb.al
