Donald Trump ka intensifikuar sërish sulmet verbale ndaj emisioneve satirike të orëve të vona, duke kërcënuar se do t’u revokojë licencat rrjeteve televizive që, sipas tij, e trajtojnë negativisht. Në qendër të kritikave të presidentit amerikan është vënë emisioni i humorit i Stephen Colbert në rrjetin CBS.
Në një postim në platformën e tij Truth Social, Trump deklaroi se CBS “duhet ta vërë në gjumë, TANI, pasi kjo është e vetmja gjë humane që mund të bëhet”, duke e cilësuar Colbert-in si “një katastrofë të mjerueshme”. Fraza e përdorur prej tij në anglisht ka edhe një kuptim të dytë, të lidhur me eutanazinë, çka ka nxitur reagime të forta.
Trump përsëriti gjithashtu thirrjet për heqjen e licencave të transmetimit, duke shkruar se nëse lajmet dhe programet e vona të natës janë “pothuajse 100% negative” ndaj tij, lëvizjes MAGA dhe Partisë Republikane, atëherë licencat e tyre duhet të revokohen. “Unë them PO”, theksoi ai.
Rrjeti CBS kishte njoftuar muaj më parë se emisioni “The Late Show with Stephen Colbert” do të përfundonte në muajin maj. Ky vendim ka shkaktuar protesta nga kundërshtarët e Trump, të cilët e kanë cilësuar anulimin e shfaqjes si një akt censurimi dhe ndërhyrjeje politike.
Ndërkohë, kompania mëmë e CBS, Paramount, i ka paguar Trump 16 milionë dollarë për të mbyllur një mosmarrëveshje ligjore që lidhej me montazhin e një interviste të Kamala Harris, rivales së tij demokrate në zgjedhjet presidenciale të vitit 2024.
Tensionet në CBS janë shtuar edhe më tej fundjavën e kaluar, kur drejtori i ri i lajmeve, Barry Weiss, bllokoi transmetimin e një reportazhi mbi pasojat e deportimeve të emigrantëve në El Salvador. Redaktori i emisionit reagoi ashpër, duke e quajtur vendimin censurë dhe duke e denoncuar si politikisht të motivuar.
Trump ka shprehur vazhdimisht dëshirën për të riformësuar peizazhin mediatik amerikan, të cilin e konsideron të paragjykuar ndaj konservatorëve. Ai ka emëruar një aleat të tij, Brendan Carr, në krye të Komisionit Federal të Komunikimeve (FCC), rregullatori kryesor i industrisë mediatike.
Carr ka shkaktuar polemika së fundmi gjatë një seance dëgjimore në Kongres, kur deklaroi se “FCC nuk është në thelb një agjenci e pavarur”, duke ngritur shqetësime për ndikimin politik mbi median dhe lirinë e shprehjes.
Më herët, rrjeti ABC kishte ndërprerë prodhimin e emisionit të Jimmy Kimmel, por pas reagimeve të forta publike u detyrua ta rikthente atë dhe t’i zgjaste kontratën komedianit.
