Tepria me ushqim dhe verë gjatë festave të Krishtlindjeve dhe Vitit të Ri shpesh çon në shtim në peshë. Midis mishrave, ëmbëlsirave dhe pijeve alkoolike, konsumi i kalorive rritet ndjeshëm, shpesh përtej nevojave tona.
Sipas ekspertëve, çelësi është përdorimi i logjikës së shëndoshë: të pini shumë ujë, të riktheheni gradualisht te aktiviteti fizik dhe të adoptoni zakone të balancuara për t’u kthyer shpejt në formë.
Po çfarë duhet bërë në këto ditë? Ëmbëlsirat mund të konsumohen, por me masë dhe vetëm kur ndiejmë dëshirë për to. Megjithatë, nëse kemi tepruar ditët e fundit, është e këshillueshme të shmangim alkoolin. Rikthimi në rutinën e zakonshme ushqimore, me vakte kryesore të rregullta dhe ushqime të lehta, është një hap i rëndësishëm.
Duhet t’i jepet përparësi frutave dhe perimeve, duke pasur parasysh se nuk ka ushqime “të këqija” për t’u demonizuar dhe as ushqime vërtet detoksifikuese. Një strategji e thjeshtë është të reduktohen porcionet në pjatë. Këto janë këshillat për një rikuperim të suksesshëm pas teprimeve festive, sipas profesoreshës Silvia Migliaccio, specialiste në Endokrinologji dhe Ushqyerje Njerëzore, si dhe Sekretare Kombëtare e Shoqatës Italiane të Shkencave Ushqimore.
Metodat e gatimit si zierja në avull, pjekja në skarë apo gatimi në tigan pa vaj janë gjithashtu të rekomanduara. Festat, edhe për shkak të kufizimeve të lidhura me Covid-19, janë shoqëruar me një stil jetese më sedentare.
Për këtë arsye, një tjetër element thelbësor është fillimi ose rifillimi i aktivitetit fizik. Një shëtitje apo vrap i përditshëm ndihmon në djegien e kalorive të tepërta dhe në largimin e përtacisë. Aktiviteti fizik rrit nivelet e endorfinës, hormone që japin ndjenjë mirëqenieje dhe euforie, të ngjashme me atë që ofrojnë ëmbëlsirat dhe alkooli.
Shoqata Italiane e Ushqyerjes Njerëzore (SINU) rekomandon që drekat dhe darkat festive të alternohen me vakte më të lehta, duke ndjekur parimet e dietës mesdhetare për pjesën tjetër të periudhës, në mënyrë që të reduktohen ditët e tepricës dhe të ruhet një ushqyerje e shëndetshme dhe e ekuilibruar. /skyweb.al
