Gjatë pasdites së sotme dhe ditës së nesërme, vendi pritet të përballet me reshje me intensitet të lartë, kryesisht në zonat veriore dhe jugore të vendit. Sipas Institutit të Gjeoshkencave, qarqet Shkodër, Kukës, Lezhë, Vlorë dhe Gjirokastër paraqiten si më të rrezikuarat, pasi priten reshje të konsiderueshme që mund të shkaktojnë vërshime të shpejta të lumenjve të vegjël malorë, si edhe rrëshqitje të dherave.
Në këto zona, veçanërisht në mjediset urbane, ekziston rreziku për përmbytje të lokalizuara, në varësi të gjendjes së sistemeve të kanalizimeve dhe kapacitetit të tyre për të përballuar sasinë e reshjeve.
Ndërkohë, llogaritjet hidrologjike të Institutit të Gjeoshkencave paralajmërojnë se reshjet e dendura të ditëve të fundit, të cilat pritet të vijojnë deri më 8 janar, do të sjellin rritje të ndjeshme dhe potencialisht të rrezikshme të prurjeve dhe niveleve të ujit në lumenjtë Drin-Buna, në Liqenin e Shkodrës, si edhe në lumenjtë Mat, Shkumbin dhe Vjosë. /skyweb.al
