Drejtoria e Përgjithshme e Tatimeve ka publikuar një sqarim zyrtar mbi deklaratën DIVA 2025 dhe mënyrën e përfitimit të kompensimit ushqimor dhe arsimor për individët.
Sipas Tatimeve, kompensimi përfitohet nga çdo individ që ka plotësuar në DIVA 2025 rubrikat përkatëse për numrin e fëmijëve në ngarkim dhe për shpenzimet arsimore. Ky përfitim u takon prindërve ose kujdestarëve ligjorë me të ardhura vjetore të tatueshme deri në 1.2 milionë lekë.
Aplikimi për rimbursim kryhet përmes dorëzimit të deklaratës DIVA 2025 në llogarinë personale në sistemin e-Filing, në rastet kur deklarata rezulton me mbipagesë. Më pas, individi duhet të hapë një kërkesë për rimbursim në modulin “Çështjet e mia”, duke bashkëngjitur dokumentacionin përkatës. Ky dokumentacion përfshin të dhënat e llogarisë bankare personale, certifikatën familjare dhe dokumente që vërtetojnë shpenzimet arsimore të kryera për fëmijët, si kontrata me institucionet arsimore dhe faturat e pagesave, përfshirë edhe kurset e gjuhëve të huaja.
Tatimet sqarojnë se përfitimi realizohet përmes zbritjes nga baza tatimore. Konkretisht, për çdo fëmijë në ngarkim nën moshën 18 vjeç, parashikohet një zbritje tatimore për shumën prej 48 mijë lekësh, ndërsa për shpenzimet arsimore për fëmijët në ngarkim përfitohet një zbritje totale deri në 100 mijë lekë.
Kërkesa për kompensim mund të bëhet vetëm një herë dhe duhet të paraqitet nga anëtari i familjes që ka të ardhurat vjetore më të larta. Sipas sqarimit zyrtar, kompensimi përfitohet edhe në rastet kur individi nuk ka pasur detyrim ligjor për të deklaruar DIVA 2025.
Drejtoria e Përgjithshme e Tatimeve thekson se qëllimi i këtij mekanizmi është lehtësimi fiskal për familjet me fëmijë dhe mbështetja e shpenzimeve ushqimore dhe arsimore, përmes një procedure të standardizuar dhe të verifikueshme. /skyweb.al
