Pas 12 vitesh në krye të qeverisë, kryeministri Edi Rama ka pranuar publikisht se Ministria e Punëve të Jashtme përbën një dështim të madh institucional. Deklarata u bë gjatë një fjalimi të gjatë pas mbledhjes së grupit parlamentar të mazhorancës.
Rama tha se Ministria e Jashtme nuk është në funksion të sfidave aktuale dhe se, sipas tij, ky institucion nuk ka kaluar asnjëherë një reformë të vërtetë. Ai pranoi se edhe ndryshimet ligjore të ndërmarra ndër vite nuk kanë prodhuar ndryshim real, por kanë qenë thjesht ndërhyrje sipërfaqësore.
“Sipas meje, Ministria e Jashtme është si Televizioni Publik Shqiptar. Është një tjetër dështim i madh i yni. Nuk është një institucion në funksion të këtyre sfidave sepse nuk është reformuar asnjëherë. Edhe ligji që bëmë nuk ishte reformë, ishte makiazh”, deklaroi Rama.
Kryeministri theksoi se ligji duhet të shërbejë si instrument për hapjen e rrugës drejt reformës së vërtetë dhe për futjen e “ajrit të pastër” në institucion. Ai nënvizoi se Shqipëria ka një diasporë të madhe dhe të kualifikuar, e cila sipas tij nuk është përfshirë si duhet në sistemin diplomatik.
Rama u shpreh gjithashtu se diaspora përbën një pjesë të rëndësishme të elektoratit, ndërsa kritikoi mënyrën se si janë administruar gradat dhe karrierat brenda diplomacisë shqiptare.
“Sa herë shkoj në atë ministri, më duket sikur aty është vetëm ministri, sekretarja dhe roja”, tha Rama, duke e përshkruar institucionin si të zbrazët dhe pa funksion real.
Deklaratat e kryeministrit hapin një debat të ri mbi përgjegjësinë politike për gjendjen e diplomacisë shqiptare dhe nevojën për një reformë të thellë institucionale, pas më shumë se një dekade qeverisjeje nga e njëjta mazhorancë./skyweb.al
