Presidenti i Republikës, Bajram Begaj, u është drejtuar deputetëve me një mesazh në çelje të sesionit të ri parlamentar, duke theksuar se Kuvendi nis punën në sesionin e dytë të legjislaturës së njëmbëdhjetë me një agjendë të ngjeshur reformash dhe me sfida të rëndësishme për vendin.
Në mesazhin e tij, Presidenti Begaj vë theksin te nevoja për vullnet politik dhe vetëdije të lartë shtetformuese, në mënyrë që çdo nismë ligjore t’i shërbejë drejtpërdrejt forcimit të shtetit të së drejtës, mirëqenies së qytetarëve dhe objektivit strategjik të Shqipërisë, anëtarësimit në Bashkimin Evropian.
Presidenti thekson se përafrimi i legjislacionit dhe përmbushja e agjendës europiane duhet të jenë prioritet absolut dhe nuk mund të zëvendësohen nga interesa të tjera politike.
Sipas tij, procesi parlamentar nuk mund të prodhojë rezultate nëse vëmendja shpërqendrohet, bashkëpunimi ngec dhe debati humbet fokusin nga interesi kombëtar.
Begaj nënvizon se në rrugën drejt Bashkimit Evropian vendi nuk ka kohë për të humbur dhe as energji për të shpërdoruar.
Presidenti shprehet se qytetarët presin nga Kuvendi më pak konflikt dhe më shumë zgjidhje konkrete, ligje cilësore, mbikëqyrje reale të qeverisjes dhe një debat politik të ndershëm, duke theksuar se demokracia nuk mund të funksionojë pa ekuilibër dhe respekt reciprok mes institucioneve.
Duke u ndalur te reforma në drejtësi, Presidenti Begaj kujton se ajo nisi si një emergjencë kombëtare dhe u mbështet gjerësisht nga qytetarët për ndërtimin e një drejtësie të pavarur dhe profesionale.
Ai thekson se politika duhet të konfirmojë mbështetjen për drejtësinë dhe të tregojë pjekuri institucionale kur ajo vepron kundër korrupsionit dhe krimit të organizuar.
Një tjetër çështje kyçe e këtij sesioni parlamentar, sipas Presidentit, është reforma zgjedhore.
Ai vë në dukje se rekomandimet e OSBE ODIHR kanë identifikuar problematika thelbësore që nuk mund të mbeten pa u adresuar dhe se kuadri ligjor zgjedhor duhet t’i nënshtrohet një reformimi tërësor, përmes një procesi gjithëpërfshirës dhe në përputhje me standardet ndërkombëtare.
Begaj paralajmëron se vonesat në ndryshimet e legjislacionit zgjedhor përbëjnë rrezik serioz për standardin e zgjedhjeve.
Në mesazh përfshihet edhe reforma administrative territoriale, e cila sipas Presidentit duhet të udhëhiqet nga interesi më i lartë i qytetarëve, nga lëvizjet demografike dhe nga nevoja për shërbime publike dhe infrastrukturë të barabartë në çdo njësi vendore.
Presidenti thekson gjithashtu rëndësinë e forcimit të kontrollit parlamentar, duke nënvizuar se qytetarët kanë nevojë ta shohin Kuvendin në veprim dhe qeverinë të japë llogari, ndërsa kjo procedurë duhet të jetë serioze dhe e përgjegjshme për të prodhuar rezultate konkrete.
Në fund të mesazhit, Begaj u kujton deputetëve se mandati i tyre përfaqëson një kontratë besimi me qytetarët, e cila matet me veprime dhe vendime të drejta.
